Երբեք չենք մոռանա հայկական վայրենությունը և չենք ների, մենք կիրականացնենք Զանգեզուրի միջանցքը, ուզի Հայաստանը, թե ոչ, եթե չի ցանկանում, մենք դա կլուծենք ուժով
Ադրբեջանի նախագահ Իլհամ Ալիևը հայտարարել է, որ Բաքուն չի կարող թույլ տալ՝ Հայաստանն իր բանակը հասցնի այնպիսի վիճակի, որում կարող է սպառնալ Ադրբեջանին:«Երբ Հայաստանում որոշ ռևանշիստական ուժեր բարձրանան այսօր, նրանք պետք է իմանան, որ անհրաժեշտության դեպքում ջախջախիչ հարված կստանան: Մենք չենք կարող թույլ տալ հայկական ֆաշիզմի վերածնունդ: Մենք չենք կարող թույլ տալ, որ Հայաստանն իր բանակը հասցնի մի վիճակի, որում մեզ համար որևէ սպառնալիք կա: Եթե մենք բացահայտենք հնարավոր սպառնալիքը, մենք անմիջապես կվերացնենք այն: Դա բոլորը պետք է իմանան՝ և՛ Հայաստանը, և՛ նրա կողմնակիցները», - երեքշաբթի ասել է Ալիևը՝ պետական AzTV հեռուստաալիքին տված հարցազրույցում, գրում է Ինտերֆաքսը։
Հայաստանին սպառնալուց հետո Ալիևն ասել է, թե այս հարցը Ադրբեջանի պաշտպանության ու ազգային անվտանգության խնդիրն է, բայց միևնույն ժամանակ, պաշտոնական Բաքուն պատրաստ է համագործակցել Հայաստանի հետ:
«Չնայած Հայաստանը պետական մակարդակով ցեղասպանություն է իրականացրել ադրբեջանցիների նկատմամբ, և մեր բոլոր պատմական և կրոնական հուշարձանները ոչնչացվել են, մենք պետք է նայենք դեպի ապագան: Մենք, իհարկե, երբեք չենք մոռանա հայկական վայրենությունը: Մենք դա երբեք չենք ների: Միևնույն ժամանակ, մենք պետք է անհրաժեշտ քայլեր ձեռնարկենք մեր շահերը պաշտպանելու համար: Զանգեզուրի միջանցքի ստեղծումը լիովին համապատասխանում է մեր ազգային, պատմական և ապագա շահերին: Մենք կիրականացնենք Զանգեզուրի միջանցքը, ուզի Հայաստանը, թե ոչ։ Եթե նա ցանկանա, մենք ավելի հեշտ կլուծենք այս հարցը, եթե չի ցանկանում, մենք դա կլուծենք ուժով», - ասել է Ալիևը:
Նշենք, որ Ալիևի սպառնալիքներին պատասխանել է ՀՀ ԱԳՆ-ն, ասելով, որ ՀՀ-ն կձեռնարկի բոլոր անհրաժեշտ միջոցները՝ իր տարածքային ամբողջականությունը պաշտպանելու համար։
