Ով ուր փախչի՝ փեշերից բռնած բերելու ենք.7 ամիս սառնարան ե՞ք սարքում, դուք սառնարան չեք կարողանում սարքել, երկրի հոգսե՞րն եք հոգալու
ՀՀ երկրորդ նախագահ Ռոբերտ Քոչարյանը հունիսի 2-ին հանդիպել է Մալաթիա-Սեբաստիա և Շենգավիթ վարչական շրջանների բնակիչների հետ։ Հանդիպմանը մասնակից պահեստազորի սպայի հարցին, թե ի՞նչ եք անելու, որպեսզի դավաճանների ելքը երկրից արգելվի, Ռոբերտ Քոչարյանը պատասխանել է․ «Ուր էլ գնան, գտնել-բերելու ենք․ այդ առումով հանգիստ եղեք։ Այս պատահածի համար մարդիկ պետք է պատասխան տան և այդ պատասխանը պետք է լինի արդարադատության միջոցով՝ հենց Հայաստանի Հանրապետությունում։ Ով ուր փախչի՝ փեշերից բռնած բերելու ենք...»։
***
Այն, ինչ տեսանք Աբովյանում, ուղղակի խայտառակություն էր: Այս մասին քաղաքացիների հետ հանդիպման ժամանակ ասել է ն ՀՀ երկրորդ նախագահ, «Հայաստան» դաշինքը գլխավորող Ռոբերտ Քոչարյանը՝անդրադառնալով զինվորների մարմինները տոպրակների մեջ նկուղներում պահելու միջադեպին:
« Գիտե՞ք, պետություններ կան, որ մինչ օրս գնում են Երկրորդ Համաշխարհային պատերազմի հետքերով և մասունքներ են գտնում, բերում-ԴՆԹ նույնականացում են անում, ազգականներին գտնում, հետո զինվորական մեծարանքով հուղարկավորում։ Պետությունն իր զինվորականի նկատմամբ վերաբերմունք է ցուցաբերում։ Իսկ այստեղ ի՞նչ են անում։
Զինվորների մասունքները լցրել են մի տեղ, թե՝ սառնարան ենք սարքելու։ Յոթ ամիս սառնարան ե՞ք սարքում։ Հայաստանում ընկերություններ կան, որ նման սառնարան կարող են պատրաստել ընդամենը 3 օրում։ Եթե դուք սառնարան չեք կարողանում սարքել, երկրի հոգսե՞րն եք հոգալու։ Այդ կադրերը նայելիս՝ ես շատ մեծ ամոթի զգացում եմ ունեցել, ամոթ սեփական պետության նկատմամբ»:
