Ինչու հայկական կողմը մերժեց.խայտառակություն է, երբ տեսնում ես պարտվում ես, հրաժարվում ես ընդունել առաջարկը`քեզ հանկարծ չասեն դավաճան.Коммерсантъ
ՀՀ երկրորդ նախագահ Ռոբերտ Քոչարյանը հարցազրույց է տվել Коммерсантъ պարբերականին, որում անդրադարձել է հունիսին կայանալիք արտահերթ խորհրդարանական ընտրություններին, Հայաստանում ստեղծված ներքաղաքական իրավիճակին և մի շարք այլ հարցերի:Խոսելով աշնանն ավարտված պատերազմից հետո Լեռնային Ղարաբաղի շուրջ ստեղծված իրավիճակի մասին` Քոչարյանն ասել է, որ «հակամարտությունը կարգավորված չէ, խաղաղության համաձայնագիր չկա»:
«Պարզապես Ռուսաստանի միջամտությունը հանգեցրեց իրավիճակի հերթական սառեցմանը, բայց դա խաղաղություն չէ: Խաղաղության մասին կարող ենք խոսել, եթե համաձայնագիր ընդունվի ղարաբաղյան հակամարտության վերջնական կարգավորման վերաբերյալ, և այն կյանքի կոչվի: Նման համաձայնագիրը կարող է ընդունվել Հայաստանի, Ադրբեջանի և Ղարաբաղի համաձայնությամբ: Արդար խաղաղություն չի լինի, եթե որոշ սահմաններում չհարգվի Ղարաբաղում բնակվող հայերի ինքնորոշման իրավունքը: Այսօր դա սառեցված իրավիճակ է: Սառեցված իրավիճակը կարող է փոխվել, եթե փոխվի ուժերի հավասարակշռությունն ու տարածաշրջանային աշխարհաքաղաքական դասավորվածությունները: Կան շատ բաներ, որոնք կարող են հանգեցնել այն փաստի, որ կողմերից մեկը հնարավոր համարի վերջնական լուծել այն (հակամարտությունը-Խմբ.) իր օգտին, կամ հակառակը ՝ վերականգնել կորցրած դիրքերը: Հետևաբար, մենք, այնուամենայնիվ, պետք է ձգտենք վերջնական կարգավորման, և դա ամրագրվի միջազգային իրավական փաստաթղթում: Դրանից հետո միայն հնարավոր կլինի ասել, որ հակամարտությունը ստացել է վերջնական և փոխընդունելի լուծում»,-ասել է Քոչարյանը:
Անդրադառնալով Երևանի և Բաքվի միջև հարաբերությունների կարգավորման հավանականությանը, ապա Քոչարյանը դա չի բացառել` ընդգծելով, որ սա պահանջում է փոխադարձ քայլեր: Այն հարցին, թե երբ է կարելի դիվանագիտական հարաբերություններ հաստատել Հայաստանի ու Ադրբեջանի միջև, Քոչարյանն ասել է.«Մենք պետք է որոշակի աստիճանի համաձայնության հասնենք, որպեսզի տեսանելի լինի ինչ-որ հեռանկար, ինչ-որ շարժում: Այդ դեպքում այդպիսի քայլը կարելի է իրական համարել: Հիմա ես չեմ տեսնում, որ դիվանագիտական հարաբերությունների հաստատումն իրողություն է»:
Խոսելով պատերազմի ժամանակ ՌԴ-ի դիրքորոշման մասին` երկրորդ նախագահն ասել է, որ որպես հայ` կցանկանար, որ Ռուսաստանն ավելի շատ կենտրոնանար իր դաշնակցային պարտավորությունները կատարելու վրա:
«Բայց կարծում եմ, որ Ռուսաստանը ցանկանում էր ամեն ինչ անել, որպեսզի հակամարտությունն արագ դադարեցվի, դուրս գար այն անհարմար ձևաչափից, որը զարգացել է այս պատերազմի արդյունքում: Բայց ինչո՞ւ չստացվեց: Հայկական կողմը մերժեց: Ռուսաստանի նախագահը հոկտեմբերի 19-ին, եթե չեմ սխալվում, առաջարկ է արել: Որքան գիտեմ, դա (պատերազմի թեժ փուլի կասեցումը-Խմբ.) կարելի էր անել ռազմական գործողությունների բռնկման առաջին շաբաթվա ընթացքում: Ռուսաստանն առաջարկ արեց, հայկական կողմը հետևողականորեն այս գործընթացը տարավ փակուղի: Հայաստանի իշխանություններն իրավիճակը տարան դեպի պատերազմ և Ռուսաստանին դրեցին այդպիսի անհարմար դրության մեջ և՛ որպես միջնորդ, և՛ մյուս կողմից՝ որպես ռազմաքաղաքական դաշնակից: Այս իրավիճակում Ռուսաստանի շահերից բխում էր հնարավորինս արագ դադարեցնել ամեն ինչ: Որքան գիտեմ, Ռուսաստանը դա փորձեց անել ռազմական գործողությունների բռնկման առաջին իսկ օրվանից: Առաջին օրվանից...Սա պարզապես խայտառակություն է: Երբ հաստատ գիտես, որ պարտվում ես, և հետևանքները շատ ավելի վատ են լինելու, և միևնույն ժամանակ հրաժարվում ես ընդունել առաջարկը միայն այն բանի համար, որ քեզ դավաճան չասեն: Դրա համար մենք հսկայական գին վճարեցինք ՝ ինչպես մարդկային կյանքերով, այնպես էլ կորցրած տարածքներով»,-ասել է Քոչարյանը:
