Էջմիածնում Փաշինյանի դիրքերը շատ թույլ են.Մանվել Գրիգորյանի մտերիմները խոստանում են «վրեժը լուծել». Դոն Պիպոն ևս չի աջակցում իշխանություններին
«Հրապարակ» թերթը գրում է, որ Էջմիածնի քաղաքապետ Դիանա Գասպարյանի ու տարածքային կառավարման և ենթակառուցվածքների նախարարի պաշտոնակատար Սուրեն Պապիկյանի աղմկահարույց զրույցի ձայնագրության «սլիվը» մտածված է արվել, որպեսզի քաղաքապետը կաշվից դուրս գա և Փաշինյանի համար հնարավորինս մեծ տոկոս ձայներ հավաքի՝ ապացուցելով իր հավատարմությունը։Թերթը շեշտում է, որ Էջմիածնի շրջանում Փաշինյանի դիրքերը շատ թույլ են։
«Այստեղ թե՛ գեներալ Մանվել Գրիգորյանի գործոնը կա՝ նրա հարազատները, մտերիմները խոստանում են գեներալի «վրեժը լուծել»՝ իշխանությանը պարտության մատնել։Կա նաև Արթուր Ասատրյանի՝ Դոն Պիպոյի ազդեցությունը, որի նկատմամբ քրեական գործեր են հարուցվել, և նա ևս չի աջակցում իշխանություններին»,–գրում է պարբերականը։
Նշվում է, որ ձայնագրության հրապարակումից հետո «Քաղաքացիական պայմանագիր» կուսակցության անդամները այն բուռն քննարկել են, և որոշել են լուրեր տարածել, թե դա հին ձայնագրություն է՝ եղել է նոյեմբեր ամսին, երբ Փաշինյանն իր էջում հայտնի գրառումն էր արել՝ կոչ անելով սահմանի տղաներին վերադառնալ և «լուծել վնգստացողների հարցերը»։ Բայց ավելի ուշ պարզ դարձավ, որ ձայնագրությունն այդքան հին չէ, այն, ենթադրաբար, հունիսի սկզբին է արվել։
«Մեզ ասացին, որ ձայնագրությունը հրապարակվելու օրը Պապիկյանն այցելել է Էջմիածին, և ՔՊ շտաբի գրասենյակից մարդիկ բարձր վեճի ձայն են լսել։ ՔՊ համապետական շտաբի ղեկավարը քաղաքապետին մեղադրել է աշխատանքները ձախողելու համար, և Էջմիածնում իրենց վիճակը գնահատել է աղետալի»:
Հիշեցնենք` համացանցում երկու օր առաջ տարածվեց Սուրեն Պապիկյանի և Դիանա Գասպարյանի զրույցը, որում վերջինս դժգոհում է Նիկոլ Փաշինյանից` հայտարարելով, թե վերջինս հանուն պետության պետք է հեռանա. «Թող թիմից ուրիշին ընտրեն, թող քեզ ընտրեն, իրան տարել ա արդեն, իրա հոգեկանը չի դիմանում»:
Ի պատասխան նրան Պապիկյանը հորդորում է պահպանել հանգստություն։
Նշենք, որ նախընտրական քարոզարշավի շրջանակում Նիկոլ Փաշինյանը հունիսի 7-ին այցելել էր էջմիածին։
Լուրեր տարածվեցին, որ Էջմիածնում տեղի ունեցած սակավաթիվ նախընտրական հանրահավաքից հետո Փաշինյանը հարբած զանգել է Դիանա Գասպարյանին, նրա հասցեին վերջին հայհոյանքները տվել՝ մեղադրելով 2 տարում իր ողջ ռեսուրսը մսխելու մեջ: Փաշինյանը ծնող է հայհոյել Գասպարյանին, սպառնացել է, որ ընտրությունից հետո մաքրելու է իր շրջապատը և սկսելու է հենց Էջմիածնից: Դիանա Գասպարյանը զանգել է Սուրեն Պապիկյանին՝ տեղեկացնելու, որ հրաժարականի դիմում է գրում, Սուրեն Պապիկյանը փորձել է կանգնեցնել։
