Էրդողանը՝ «Ստամբուլ» ջրանցքի կառուցման մասին՝այն նոր շունչ կտա Ստամբուլին
Թուրքիայի նախագահ Ռեջեփ Թայիփ Էրդողանը հայտարարել է, որ շուտով սկսվելու է «Ստամբուլ» ջրանցքի կառուցումը, որը կանցնի Բոսֆորին զուգահեռ ու կմիացնի Սև և Մարմարա ծովերը։ Տեղեկությունը հայտնում է ՌԻԱ Նովոստին:Հունիսի 26-ին Թուրքիայի նախագահը մասնակցել է «Ստամբուլ» ջրանցքի շինարարության մեկնարկի հանդիսավոր արարողությանը։ Նախագծի իրականացումը սկսվել է ապագա ջրանցքի վրայով անցնող վեց կամուրջներից մեկի հիմնարկեքով:
«Մենք միայն ջրանցք չենք կառուցում, կլինեն նաև նավահանգիստներ ու ենթակառուցվածքների այլ օբյեկտներ, որոնք շատերին կապահովեն աշխատանքով, ջրանցքը նոր շունչ կտա Ստամբուլին», - ասել է Էրդողանը՝ ելույթ ունենալով իշխող «Արդարություն և զարգացում» կուսակցության խորհրդարանական խմբակցության առջև:
Նրա խոսքով՝ ջրանցքի շուրջը նախատեսվում է կառուցել սեյսմակայուն տներ, որտեղ բնակվելու է մոտ 500 հազար մարդ։ Նախագիծը ծրագրում են ավարտել վեց տարի անց։
Բացի այդ, Թուրքիայի նախագահը ընդդիմությանը կրկին մեղադրել է ջրանցքի կառուցման համար խոչընդոտներ ստեղծելու համար։
Էրդողանը ջրանցքի կառուցման գաղափարը հնչեցրել էր 2011թ. ապրիլին։ Նախագծի համաձայն՝ Ստամբուլը պետք է բեռնաթափի Բոսֆորի նեղուցը, որի միջով ամեն տարի անցնում են ավելի քան 50 հազար տարբեր նավեր, այդ թվում՝ նավթով լցանավեր։
Նախագծի համաձայն՝ 45-50 կմ երկարությամբ ջրանցքը Մարմարա ծովը կմիացնի Սև ծովին։ Խորությունը կկազմի 25 մետր, իսկ լայնությունը՝ 150 մետր: Նախագծի արժեքը 10 մլրդ դոլար է գնահատվում: Նախնական հաշվարկներով՝ նոր ջրանցքի թողունակությունը կկազմի տարեկան 85 հազար նավ։
