«Իմ քայլի» ցուցակով մանդատ ստացած պատգամավորը համաձայն չէ,սխալ է համարում իշխանությունների քաղաքականությունը
Դեռևս երեկ պատգամավորի մանդատ ստացած իմքայլական պատգամավոր Արա Մելիքջանյանը հենց նույն օրը խմբակցությունից դուրս գալու դիմում է ներկայացրել, սակայն պատգամավորի մանդատը վայր չի դնի և իր գործունեությունը կշարունակի որպես անկախ պատգամավոր:«Փաստինֆո»-ն հետաքրքրվեց, ինչո՞վ էր պայմանավորված պատգամավորի այս որոշումը, վերջինս էլ արձագանքեց.
«Այդպես էր պետք, ցանկանում եմ պատգամավորի գործունեությունս շարունակել, բայց ոչ խմբակցության կազմում, թեկուզ այս կարճ ժամանակահատվածում կգործեմ անկախ պատգամավոր»,-ասաց նա:
Արա Մելիքջանյանը վստահեցրեց, որ «Իմ քայլը» խմբակցության պատգամավորների հետ որևէ տարաձայնություն չի եղել, պարզապես համոզմունքների և պատկերացումների տարբերության հարց է եղել.
«Իմ ունեցած պատկերացումները տարբեր ոլորտների վերաբերյալ՝ արտաքին քաղաքականության, տնտեսության զարգացման, կադրային քաղաքականության, ժողովրդավարական արժեհամակարգի հարցում էականորեն տարբերվել են»,-ասաց Մելիքջանյանը:
Իսկ թե Հայաստանում և Արցախում ստեղծված անվտանգային իրավիճակի առումով գործող իշխանությունը ճի՞շտ քաղաքականություն է վարում,զրուցակիցն ասաց.
«Միանշանակ՝ ոչ, սխալ քաղաքական իրավիճակ է այն ամենը, ինչ մենք ունենք»:
Պատգամավորն, անդրադառնալով նաև երեկ ԱԺ արտահերթ նիստում ընդունված նախագծին, որով պատգամավորական գործունեության հետ կապված ծախսերը 50.000 դրամից ավելացվում է 250.000 դրամ, նշեց, որ ստեղծված իրավիճակում նման նախագծի ընդունումն ուղղակի աբսուրդ է.
«Ես չեմ մասնակցել այդ նախագծի քվեարկության: Երկրի առջև ծառացած մի շարք մարտահրավերներ կան, օրինակ՝ սահմանների կահավորման խնդիրը, որն այս պահի դրությամբ ամենակարևորն է, այդ խնդիրը թողած քննարկվում է պատգամավորի գործառույթի իրականացման ծախսը: Ստացվում է, որ իրենց աշխատավարձը, պարգևավճարներն այնքան քիչ են, այնքան խեղճ են պատգամավորները, որ մի հատ էլ իրենց ծախսերը պետք է ավելացվի , որպեսզի ինքը գնա իր ընտրողին տեսնելու, սրա լոգիկան ո՞րն է: ՀՀ քաղաքացիները հարկերի միջոցով աշխատավարձ են ձևավորում պատգամավորների համար, մի հատ էլ լրացուցիչ գումար պետք է տան, որ պատգամավորը գնա իրեն տեսնելու, իր խնդիրը լսելու, սա աբսուրդ է»,-ասաց Արա Մելիքջանյանը:
