ՊՆ-ն անդրադարձել է շրջանառվող այն լուրերին, թե 3 զինվորների մահվան պատճառը դիվերսիան է
Հայաստանի մարտական հենակետերից մեկում 3 զինծառայողների դի հայտնաբերելու դեպքը հակառակորդի գործողությունների հետ կապ չունի։ Sputnik Արմենիայի հետ զրույցում հայտնեցին պաշտպանության նախարարության տեղեկատվության և հասարակայնության հետ կապերի վարչությունից։Հայտնել էինք, որ օգոստոսի 19-ին, ժամը 02։15-ի սահմաններում, հանրապետության հարավ-արևելյան ուղղությամբ տեղակայված ՀՀ ԶՈւ N զորամասի պահպանության տարածքում գտնվող մարտական հենակետում հայտնաբերվել է 3 զինծառայողի դի։ Նշենք, որ լուրեր են շրջանառվում, թե տեղի ունեցածը դիվերսիա է։
«Դեպքի հանգամանքները բացահայտելու համար այս պահին անհրաժեշտ քննչական գործողություններ են ընթանում: Սակայն գոնե այս պահին եղած նախնական տեղեկություններով՝ տեղի ունեցածը կապ չունի հակառակորդի գործողությունների հետ»,–ասացին ՊՆ–ից։
Sputnik Արմենիայի տեղեկություններով` զինծառայողներից մեկը ոգելից խմիչքի ազդեցության տակ է եղել, ինչի արդյունքում էլ կռիվ է սկսվել նրանց միջև։
Հիշեցնենք, որ ՀՀ ԶՈւ N զորամասի պահպանության տարածքում գտնվող մարտական հենակետում հայտնաբերվել են շարքայիններ, 2002թ. ծնված Մուրադ Աշոտի Մուրադյանի, 2002 թ. ծնված Լևոն Ռաֆայելի Հարությունյանի և 2002թ. ծնված Գոռ Արտակի Սահակյանի դիերը՝ հրազենային վիրավորումներով։
