Ադրբեջանի եւ Իրանի սահմանին փոխհրաձգություն է տեղի ունեցել
Ադրբեջանա-իրանական սահմանին փոխհրաձգություն է տեղի ունեցել, կա վիրավոր: Այս մասին հայտնում են ադրբեջանական լրատվամիջոցները՝ վկայակոչելով գլխավոր դատախազության եւ պետական սահմանային ծառայության համատեղ հայտարարությունը:«Հորադիզ» սահմանապահ ջոկատի սահմանապահները Բոյուք Բահմանլի գյուղի մոտակայքում գտնվող սահմանապահ դիրքի տարածքում սեպտեմբերի 8-ի գիշերը (00:57) նկատել են, թե ինչպես է երեք անհայտ անձ խախտել պետական սահմանն Իրանի Իսլամական Հանրապետությունից Ադրբեջանի ուղղությամբ:
Իրավախախտներն անտեսել են սահմանապահների նախազգուշացումը եւ օդ արձակած նախազգուշական կրակը: Սահմանախախտների փախուստի փորձը կանխելու համար սահմանապահները զենք են կիրառել: Սահմանախախտներից մեկը վիրավորվել է, երկուսին հաջողվել է փախչել:
Ձեռքից թեթեւ վիրավորված սահմանախախտը տեղափոխվել է հիվանդանոց: Ձերբակալվածը ներկայացել է որպես 1981 թվականին ծնված Իրանի Իսլամական Հանրապետության քաղաքացի Զամանի Միրասկեր Միրագա: Նրա պայուսակը զննելիս հայտնաբերվել են դեղորայքի նման նյութեր՝ մոտ 11 կիլոգրամ 770 գրամ քաշով: Միջադեպի մասին իրանական կողմը տեղեկացվել է:
