Քիչ առաջ տեղեկացանք, որ ԱԺ պատգամավորները ստացել են պարգևավճար.ընդդիմությունը վերսկսում է փողոցային պայքարը
Խորհրդարանական ճեպազրույցի ժամանակ «Հայաստան» խմբակցության պատգամավորները հայտնեցին, որ առանց իրենց իմացության, ԱԺ պատգամավորները, այդ թվում՝ ընդդիմադիր, այսօր ստացել են պարգևավճար. «Ենթադրում ենք, որ դա նվիրված է անկախության տոնին: «Հայաստան» դաշինքի անունից հայտնում ենք, որ այդ պարգևավճարներից չենք օգտվելու: Անընդունելի ու դատապարտելի է, երբ երկրում կան սոցիալական ծանր խնդիրներ, մինչդեռ այս իրավիճակում շարունակում են պարգևավճար տալ»,- ասաց փոխխոսնակ Իշխան Սաղաթելյանը՝ հավելելով, որ գումարը կա՛մ կվերադարձնեն պետբյուջե, կա՛մ սահմանամերձ մարզերում կիրականացնեն որևէ ծրագիր:Իշխան Սաղաթելյանը հայտարարեց, որ ընդդիմությունը վերսկսում է փողոցային պայքարը, հանրահավաքները.
«Երկիրը գտնվում է խիստ բախտորոշ փուլում, կա ճգնաժամ, պետականությանը վտանգ է սպառնում: Այս թեմայով մենք քննարկում ենք ունեցել և պլանավորել մեր առաջիկա աշխատանքները, նաև լսել ենք մեր համակիրների տեսակետը՝ առաջիկա անելիքների վերաբերյալ:
Մենք մշտապես հայտարարել ենք, որ չենք հրաժարվելու փողոցային պայքարից: Այս փուլում ակտիվ քննարկումների մեջ ենք, թե ինչ անենք, որպեսզի չեզոքացնենք մեր երկրին սպառնացող վտանգները և կանխենք Հայաստանի թուրքացումը: Այս իմաստով ընդդիմությունը, մասնավորապես մեր դաշինքը, անելիք ունի: Առաջիկայում դուք ականատես կլինեք նաև փողոցային ակցիաների և գործողությունների»,-ասաց Սաղաթելյանը:
