Իմ բարբառով Կովսականն ու Սանասարն Արցախ են, Նիկոլի բարբառով Արցախն Ադրբեջան է
Պաշտպանության նախկին նախարար Վաղարշակ Հարությունյանը դեկտեմբերի 17-ին եկել է Գորիս եւ պահանջել, որ զինված ուժերը Գորիսից եւ Մեղրիից հետ գնան՝ թողնելով Կովսականի (Զանգելան) եւ Սանասարի (Կուբաթլու) դիրքերն Ադրբեջանին: «Հայաստան» դաշինքի պատգամավոր, Սյունիքի նախկին մարզպետ Արթուր Սարգսյանի այս բացահայտումը եւս մեկ անգամ հաստատեց, որ Փաշինյանն ու նրա պաշտպանության նախարարն ամեն ինչ արել են, որ Ադրբեջանը հնարավորինս շահած դուրս կա պատերազմից: «Մեզ մոտ մտահոգություն է առաջանում, քանի որ բարձրաստիճան պաշտոնյաներն ասում էին, որ բոլորը մնում են այն դիրքերում, որտեղ կանգնած են։ Նոյեմբերի 9-ի պայմանագրի մեջ էլ նշված չէ, թե մենք ինչու պետք է հետ գանք։ Նախարարին էլ ինչ հարցնում էինք, ասում էր՝ ես տեղյակ չեմ, վաղը ժամը հինգին բոլորդ պետք է հետ գաք։ Մայիսի 23-ից մինչեւ հունիսի 8-ը եղել եմ Իշխանասարում, իմ ավագանու ընկերների, համայնքապետերի հետ սահմանի պաշտպանություն ենք իրականացրել։ Այս պահին թուրքը գտնվում է Սիսիանի վարչական տարածքում՝ Սեւ լճից վերեւ՝ Իշխանասարի հատվածում»,- ասել է Արթուր Սարգսյանը:
ԳՇ նախկին պետ Մովսես Հակոբյանին, որն այդ պաշտոնին հրաժեշտ է տվել նոյեմբերի 9-ի փաստաթղթի ստորագրումից 10 օր անց, մի քանի հարց ուղղեցինք:
-Արդյոք նոյեմբերի 9-ի փաստաթղթով նախատեսվա՞ծ էր նման բան, որ մեր ուժերը գնան սահմաններից:
-Այո: Ամսի 9-ին ստորագրված փաստաթղթում ամեն ինչ գրված է եղել: Ինչո՞ւ մարդիկ չեն հասկանում ու այսօր շահարկում են, ես չեմ հասկանում: Այն ժամանակ, երբ ես կարդացի այդ փաստաթուղթը, ինձ համար պարզ էր, որ այդ դիրքերից դուրս ենք գալու: Այնտեղ շատ հստակ գրված է, որ Հայաստանի Հանրապետության զինված ուժերը միայն կանգնելու են Հայաստանի Հանրապետության պետական սահմանին: Ուրիշ տեղ Հայաստանի Հանրապետությունը զինված ուժեր չի ունենալու:
-Մեղրիի ու Գորիսի դիրքերի մասին չէ՞ խոսքը, Հայաստանի Հանրապետության սահմանի:
-Հիմա ես իմ բարբառո՞վ խոսեմ, թե՞ Նիկոլի: Իմ բարբառով Կովսականն ու Սանասարն Արցախ են, Նիկոլի բարբառով Արցախն Ադրբեջան է:
-Փաստաթղթում գրված է, որ բոլոր ուժերը մնալու են այնտեղ, որտեղ որ կանգնած էին, երբ ավարտվեց պատերազմը:
-Դրան հաջորդող կետ կա: Այնտեղ գրված է, որ ռուսական խաղաղապահ ուժերի տեղակայմանը զուգահեռ, հայկական զինված ուժերը դուրս են բերվում: Այն, ինչ արվել է, համապատասխանել է նոյեմբերի 9-ի փաստաթղթին:
hraparak.am
