Բաքուն դժգոհություն է հայտնել Մոսկվային.Ադրբեջանցիներին զայրացրել էր փակագծերում Արևելյան Հայաստանի հիշատակումը
Ադրբեջանի ԱԳՆ–ն իր դժգոհությունն է հայտնել ռուսական կողմին 1828 թվականի Թուրքմենչայի պայմանագրի մասին «խեղաթյուրված» տեղեկատվության առնչությամբ։Պայմանագրի ստորագրման 194-րդ տարեդարձին ընդառաջ ՌԴ ԱԳՆ–ի պաշտոնական էջերում հրապարակում է տեղադրվել։
Ադրբեջանական կողմին կարող էր զայրացնել այն, որ շուրջ 200 տարի առաջ ստորագրած փաստաթուղթը կնքվել է նույն օրը, ինչ ռուս–ադրբեջանական հռչակագիրը։ Բայց` ոչ, խոսքը մասնավորապես Արևելյան Հայաստան արտահայտության մասին է։
«Ռուսական կայսրությանն անցան Էրիվանի ու Նախիջևանի խանությունները (Արևելյան Հայաստան)։ Իրանի կառավարությունը պարտավորվել էր չխոչընդոտել Հայկական մարզ հայերի տեղափոխմանը...», – ասվում է ՌԴ ԱԳՆ հայտարարության մեջ։
Ադրբեջանցիներին զայրացրել էր փակագծերում Արևելյան Հայաստանի հիշատակումը։ Բաքվում հայտարարել են, որ «խեղաթյուրված տեղեկատվության ուղղում» են ակնկալում։
«Զարմանալի և ցավալի է, որ Ռուսաստանի Դաշնության արտաքին գործերի նախարարության սոցիալական ցանցի պաշտոնական էջը խեղաթյուրված տեղեկատվություն է հրապարակել 1828 թվականի Թուրքմենչայի պայմանագրի մասին հենց նույն այն օրը, երբ ընդունվել է Ադրբեջանի և Ռուսաստանի միջև դաշնակցային համագործակցության մասին հռչակագիրը»,- ասվում է Ադրբեջանի ԱԳՆ հաղորդագրության մեջ:
Ադրբեջանական ԱԳՆ-ն նշում է, որ իբր վերոնշյալ համաձայնագրի տեքստում Արևելյան Հայաստան արտահայտությունը որևէ կերպ նշված չէ։
«Իհարկե, այս փաստը քաջ հայտնի է ՌԴ ԱԳՆ-ի պատմական փաստաթղթերի վարչությանը։ Մենք անհրաժեշտ ենք համարում վերացնել խեղաթյուրումը և ակնկալում ենք ՌԴ ԱԳՆ սոցցանցի պաշտոնական էջում նշված կեղծ տեղեկատվության համապատասխան շտկում»,- ասվում է Ադրբեջանի ԱԳՆ հաղորդագրության մեջ։
