ԱՄՆ-ը ներգաղթի ժամանակավոր արտոնություններ կտրամադրի ուկրաինացիներին՝ կացարան, աշխատանք
ԱՄՆ-ն ուկրաինացիներին ներգաղթի ժամանակավոր արտոնություններ կտրամադրի, որոնք նախատեսում են պաշտպանություն արտաքսումից եւ աշխատանքի թույլտվություն տասնյակ հազարավոր այն ուկրաինացիների համար, ովքեր այժմ գտնվում են ԱՄՆ-ում, բայց չեն կարող վերադառնալ հայրենիք: Այս մասին հայտնում է երկրի ներքին գործերի նախարարությունը։Այս միջոցը Միացյալ Նահանգներ մինչեւ 2022թ․ մարտի 1-ը մտած ուկրաինացիներին թույլ կտա մնալ երկրում եւ 18 ամիս օրինական աշխատել, հայտնում է «Ամերիկայի ձայնը»։
Ուկրաինայի քաղաքացիները կազատվեն արտաքսումից եւ աշխատանքի թույլտվության իրավունք կստանան այն ծրագրի շրջանակներում, որը հայտնի է որպես «Ժամանակավոր պաշտպանված կարգավիճակ» (TPS): Ծրագիրը պաշտպանություն է տրամադրում այն ներգաղթյալներին, որոնք չեն կարող վերադառնալ իրենց երկրներ արտակարգ հանգամանքների, այդ թվում՝ զինված բախումների եւ բնական աղետների պատճառով։ Ծրագրի մասնակիցներին հնարավորություն է տրվում որոշալի ժամկետով մնալ եւ օրինական աշխատել Միացյալ Նահանգներում:
ԱՄՆ ներգաղթի եւ մաքսային ծառայությունը հայտարարել է «շարունակվող հումանիտար ճգնաժամի» պատճառով Ուկրաինա արտաքսման թռիչքների դադարեցման մասին։
