300 000 բնակչով պաշարված Մարիուպոլը մերժել է Ռուսաստանին հանձնվելու առաջարկը
Ուկրաինան մերժել է ՌԴ-ի առաջարկն առ այն, որ Մարիուպոլ քաղաքի զորքերը վայր դնեն զենքերն ու հանձնվեն, ինչից հետո պաշարված քաղաքում մնացած 300 000 բնակիչներին թույլ կտրվի ապահով լքել քաղաքը:Ինչպես գրում է Daily Mail-ը, ՌԴ ԶՈՒ գեներալ-գնդապետ Միխայիլ Միզինցևը կիրակի ուշ երեկոյան ներկայացրել է Մոսկվայի առաջարկը՝ ասելով, որ ուկրաինական զորքերը և օտարերկրյա վարձկանները, որոնք վայր կդնեն զենքերը և կբարձրացնեն սպիտակ դրոշներ, կկարողանան հեռանալ մարդասիրական միջանցքներով: Դրանից հետո խաղաղ բնակիչները կտարհանվեն: Նա Ուկրաինային պատասխանելու համար ժամանակ էր տվել մինչև առավոտյան ժամը 5-ը:
Բայց Մարիուպոլը մերժել է պահանջները, իսկ Պյոտր Անդրյուշենկոն՝ քաղաքապետի խորհրդականը, ասել է, որ ռուսական կողմի խոստումներին չի կարելի վստահել, և որ քաղաքը պաշտպանող զորքերը վճռական են պայքարելու մինչև վերջին մարդը:
Մարիուպոլը երեք շաբաթ շրջափակման մեջ է՝ սննդի կամ ջրի սակավ հասանելիության և էլեկտրաէներգիայի բացակայության պայմաններում, խաղաղ բնակիչներին տարհանելու բազմաթիվ փորձեր ձախողվել են այն պնդումների պատճառով, որ Ռուսաստանը ռմբակոծել և գնդակոծել է մարդասիրական ուղիները:
