29-ամյա հղի կնոջը վրաերթի ենթարկած մայորն ազատության մեջ է.ընդդիմությունը թող ընդդիմանա, ոչ թեդժբախտությունն օգտագործի, չի հետաքրքրում նրանց կարծիքը․ «Հրապարակ»
«Հրապարակ» թերթը գրում է․ «Ապրիլի 26-ին Լեո-Պարոնյան փողոցների խաչմերուկում տեղի ունեցած վթարի գործով ձերբակալված ոստիկանը՝ մայոր Արամ Նավասարդյանը, ազատ է արձակվել։ Այս լուրը զայրույթ առաջացրեց, քանի որ կա հղի կնոջ եւ պտղի մահ։ Քննչական կոմիտեից ճշտեցինք՝ Արամ Նավասարդյանի լիազորությունները` որպես վաշտի հրամանատարի, անգամ կասեցված չեն։ Նրա պաշտպան Ռուբեն Բալոյանը, անդրադառնալով լիազորությունները չկասեցնելուն, նշեց. «Որեւէ վրաերթ կատարող անձի գործողություն երբեւէ չի կասեցվել պատմության մեջ` անկախ վրաերթի ելքից»։ Նա նշեց․ «Պետք է սպասենք փորձաքննությունների արդյունքներին, քննություն է կատարվում»։ Փաստաբանի խոսքով` Արամ Նավասարդյանն աշխատանքի չի գնում. «Մի քիչ իր բարոյահոգեբանական վիճակը լավ չէ»։ Դիտարկմանը, որ ընդդիմությունը դժգոհեց նրան ստորագրությամբ ազատ արձակելու որոշումից` համեմատության մեջ դնելով այն փաստի հետ, որ Արմեն Մարտիրոսյանին պլաստիկ շշով խփողը կալանավորված է, իսկ հղի կնոջը սպանողը՝ ազատության մեջ, փաստաբանն արձագանքեց. «Ընդդիմությունն ուզում է այս դեպքից օգտվել, ընդդիմությունը թող ընդդիմանա, ոչ թե մահվան ելքով դժբախտությունն օգտագործի։ Ինձ ընդհանրապես չի հետաքրքրում ընդդիմության կարծիքը»։ Իսկ Նավասարդյանը գոնե տեսակցել-ցավակցե՞լ է մահացածի ընտանիքի անդամներին, ասաց՝ կարծում եմ, կփորձի տեսակցել։Նշենք, որ Նավասարդյանին մեղադրանք է առաջադրվել Քրեական օրենսգրքի 242-րդ հոդվածի 2-րդ մասով, այսինքն՝ ճանապարհային երթեւեկության անվտանգության ապահովմանն ուղղված պահանջները խախտելը, որն անզգուշությամբ առաջացրել է մարդու մահ: Վրաերթը տեղի ունեցել վարչապետ Նիկոլ Փաշինյանին ուղեկցող ավտոշարասյան կողմից` «Ճանապարհային ոստիկանություն» ծառայությանն ուղեկցող սպայական վաշտի ավտոմեքենայով»:
Մանրամասները՝ թերթի այսօրվա համարում։
