Ուկրաինան հրետանային պատերազմում պարտվում է Ռուսաստանին
Ուկրաինան ներկայումս ապավինում է արևմտյան սպառազինությանը, սակայն զինամթերքը սակավ է: Այս մասին հայտարարել է Ուկրաինայի ռազմական հետախուզության ղեկավարի տեղակալ Վադիմ Սկիբիցկին. գրում է The Guardian-ը։Նա նշել է, որ Ուկրաինան, այս առումով, առաջնագծում պարտվում է Ռուսաստանին և բացառապես ապավինում է Արևմուտքի զենքին։
«Հիմա հրետանային պատերազմ է, ապագան այժմ կորոշվի առաջնագծում, և մենք պարտվում ենք՝ հրետանու առումով», - ասել է Սկիբիցկին:
Ամեն ինչ կախված է նրանից, թե Արեւմուտքն ինչ կտրամադրի Ուկրաինային։
«Ուկրաինան յուրաքանչյուր 10-15 ռուսական հրետանու դիմաց մեկ հրետանային միավոր ունի, մեր արևմտյան գործընկերները մեզ տվել են իրենց ունեցածի մոտ 10 տոկոսը»,- հավելել է նա։
Սկիբիցկու խոսքով՝ Ուկրաինան օրական կիրառում է 5000-ից 6000 արկ:
«Մենք կիրառել ենք գրեթե ամբողջ (հրետանային) զինամթերքը և այժմ օգտագործում ենք ՆԱՏՕ-ի ստանդարտ՝ 155 տրամաչափի արկեր», - ասել է նա։
Սկիբիցկիի խոսքերը հաստատվում են ԱՄՆ ռազմական հետախուզության վերջին զեկույցում արված հայտարարություններով: Գործակալության հետ զրուցած ռազմական աղբյուրների համաձայն՝ Ուկրաինան սպառել է խորհրդային և ռուսական արտադրության զենքերը և այժմ ամբողջովին կախված է իր դաշնակիցներից:
