1,5 միլիարդանոց ժողովրդի դեմ պայքարը լավ բանի չի հանգեցնի. Չինաստանը զգուշացրել է ԱՄՆ-ին
Չինաստանի ԱԳՆ-ն Միացյալ Նահանգներին ուղղված նախազգուշական հայտարարություն է արել։Չինաստանի Պետական խորհրդի անդամ, ԱԳ նախարար Վան Ինը ասել է, որ ամերիկացիների պայքարը շուրջ 1,5 միլիարդ բնակչությամբ Չինաստանի հետ լավ բանի չի հանգեցնի։
«Թայվանի հարցում ԱՄՆ-ի պարտավորությունների խախտումը, ինչպես նաև նախապես ծրագրված սադրանքները կարող են միայն հեղինակազրկել ԱՄՆ–ին։ Ավելի քան 1,4 միլիարդանոց Չինաստանի ժողովրդի հետ թշնամությունը հաստատ ոչ մի լավ բանի չի հանգեցնի»,- ասել է Վան Ինը։
Նշենք, որ օգոստոսի 4-ից Չինաստանի ԶՈւ-ն հրթիռների, ավիացիայի և ռազմանավերի օգտագործմամբ լայնածավալ զորավարժություններ է սկսել Թայվանի շուրջ։ Իրավիճակը տարածաշրջանում սրվել է այն բանից հետո, երբ ԱՄՆ Ներկայացուցիչների պալատի խոսնակ Նենսի Փելոսին օգոստոսի 2-ին այցելեց Թայվան։ Նա ամերիկացի ամենաբարձրաստիճան պաշտոնյան է, որը կղզի է այցելել վերջին 25 տարվա ընթացքում։
