Նախ, մեղավոր է այն մարդը, ով Արզումանյանին նշանակել է այդ պաշտոնին.Շուշիի հետ կապված շատ մարդիկ են դեռ պատասխան տալու ու կալանավորվելու.«Իրավունք»
«Իրավունք» թերթը գրում է․ «Արցախի ՊԲ նախկին հրամանատար Միքայել Արզումանյանին առաջադրված մեղադրանքի, Շուշիի անկման մեղավորների շրջանակի մեծացման, Պաշտպանության նախարարության առաջարկած` 24 միլիոն դրամանոց «դասալքության» նախագծի շուրջ «Իրավունքը» զրուցել է ՊՆ նախկին փոխնախարար, ԱԺ իշխող խմբակցության պատգամավոր Գագիկ Մելքոնյանի հետ: Մեր զրուցակիցը նախ միանշանակ պնդեց.—Եթե կալանավորել են, ուրեմն հիմքեր ունի նախաքննության մարմինը: Իսկ ինչ վերաբերում է կոնկրետ Շուշիի անկման մեջ նրա գործողություններին, ապա ասեմ, որ Շուշիի հետ կապված շատ մարդիկ են դեռ պատասխան տալու ու կալանավորվելու:
— Ճանաչե՞լ եք Արզումանյանին:
— Ճանաչել եմ, երբ նա եղել է Մարտակերտի գնդի հրամանատար, երբ եղել է գումարտակի հրամանատար 8-երորդում: Շատ վաղուց եմ ճանաչել:
— Եվ ինչպե՞ս կբնորոշեք նրան՝ որպես զինվորական:
— Ես իրեն ճանաչել եմ, բայց իր հետ չեմ ծառայել: Բայց իր վերջին գործողությունների մասին ոչինչ չգիտեմ: Գիտեմ, որ ինքը նշանակվել է պատերազմի ավարտից մոտ 10-15 օր առաջ: Ընդ որում, այդ պաշտոնին նշանակվել է ոչ որպես գործող զինվորական. նա զորացրված է եղել:
— Այսինքն՝ ի՞նչ եք ուզում ասել, պարոն Մելքոնյան:
— Նախ, մեղավոր է այն մարդը, ով Արզումանյանին նշանակել է այդ պաշտոնին: Էն, ով որ նշանակել է իրեն` կլինի Օնիկ Գասպարյանը, թե ով, ամենամեծ մեղավորն է: Որովհետեւ էդ մարդը զինվորական ծառայության մեջ չլինելով, նշանակվել է այդ պաշտոնին:
— Ի դեպ, ե՞րբ է պատասխանատվության ենթարկվելու Օնիկ Գասպարյանը:
— Քննիչ հանձնաժողովը ուսումնասիրում է բոլորի գործողությունները ու երբ ավարտի, վստահ եղեք, որ բոլոր մեղավորները, թե ով ինչ է արել, ով ոնց է գործել, պատասխան են տալու, չկասկածեք: Էսքանը այս հարցով:
— Պաշտպանության նախարարությունը առաջարկում է` 24 միլիոն դրամ վճարելու դեպքում պարտադիր զինվորական ծառայությունը դարձնել 4,5 ամիս՝ 2 տարվա փոխարեն, Ձեր գնահատականը:
— Դա լոկ նախագիծ է, որ դեռ պետք է քննարկվի թե՛ հասարակության, թե՛ կառավարության նեղ շրջանակում, հետո նոր կբերվի ԱԺ:
— Ձեր տեսակետն ենք ուզում իմանալ:
— Ես գտնում եմ, որ հիմա դրա ժամանակը չէր, դա պատեհ կլիներ այն ժամանակ, երբ մենք արդեն պրոֆեսիոնալ բանակ ունենայինք: Բայց այս պահին այս նախագիծը պայթյունավտանգ է հենց հասարակության մեջ: Ես ժողովրդի հետ շփվում եմ ու տեսնում, որ մարդիկ շատ վատ են ընդունել, ասում են` էլի հարուստների ու աղքատների կբաժանվի հասարակությունը: Հարուստները պետք է փող տան` էրեխեքին ազատեն, իսկ աղքատները` գան երկուսի տեղն էլ կռվեն: Ա՛յ, էսպիսի մտահոգություններ կան:
— Իսկ այդ մտահոգությունները չե՞ք փոխանցել կառավարությանը:
— Իհարկե: Հիմա քննարկումների շրջան է, շատ հնարավոր է, որ այդ նախագիծը մինչեւ Ազգային ժողով էլ չհասնի: Որովհետեւ հետեւանքները շատ ծանր են լինելու: Եթե չփոխվի նախագիծը, ես այդ ժամանակ իմ խոսքը կասեմ»:
Մանրամասները՝ թերթի այսօրվա համարում։
