Մտածել, որ ՌԴ-ն կարող է ռազմական գործողություներ սկսել Ադրբեջանի դեմ, անհեթեթություն է,մենք հասել ենք պլենդուզի մակարդակի, բանակցությունների սեղանի վրա ենք, այլ ոչ թե սեղանի շուրջ

Ռուսաստանն ամեն ինչ անում է ու անելու է, որ բախում չլինի Հայաստանի ու Ադրբեջանի միջև. այս տեսակետն ունի ՀՀ երկրորդ նախագահ Ռոբերտ Քոչարյանը։

«Ռուսաստանն այսօր ունի դաշնակցային հարաբերություններ նաև Ադրբեջանի հետ ու մտածել, որ Ռուսաստանը կարող է ռազմական գործողություներ սկսել Ադրբեջանի դեմ, ուղղակի անհեթեթություն է, չի լինելու նման բան», - մամուլի ասուլիսի ժամանակ ասաց նա։

Ըստ նրա՝ հակառուսական տրամադրությունների «պուլտը» Ալիևի ձեռքում է ու երբ ուզի՝ կմիացնի։

Երկրորդ նախագահը կարծում է, որ, բացի Հայաստանից, Սյունիքը կարևոր է նաև Իրանի համար։

«Առնվազն մի երկու զորավարժություն պետք է անեինք Իրանի հետ Սյունիքում, որոշ պայմանագրային բազա պետք է լիներ Իրանի հետ այս ընթացքում ու այդ ամենն ամենից մեծ զսպող հանգամանքը կլիներ Ադրբեջանի համար, որովհետև Իրանն այն պետությունը չէ, որին ինչ-որ տեղից մատ թափ տալով՝ կարելի է կանգնեցնել», - ընդգծեց Քոչարյանը։

Երկրորդ նախագահն ասում է` ՀՀ–ում իրավիճակը պայթյունավտանգ է, քանի որ, մի կողմից, կա որոշում կայացնելու պարտադրանք, իսկ մյուս կողմից վտանգ կա, որ այդ որոշումը կարող է ներսից պայթեցնել ՀՀ–ում իրավիճակը։

«Մեր դերակատարությունը տարածաշրջանում շեշտակի նվազել է` մենք ինքներս հասել ենք պլենդուզի մակարդակի։ Բանակցությունների սեղանի վրա ենք, այլ ոչ թե սեղանի շուրջ` թույլերին ոչ ոք չի սիրում, նրանց հետ ընկերություն չեն անում։ Նույնը միջազգային կատերգորիայում է։ Չի կարելի պետությանը մուրացկան սարքել»։