Մեզ համար անընդունելի են Հայաստանի տարածքի վրա հարձակումները.ինքը պետք է որոշի, թե որն է իր առաջընթացի լավագույն ուղին. ԱՄՆ կոնգրեսական
Վերջին շրջանում ամերիկյան կոնգրեսական պատվիրակությունների այցերը Հայաստան վկայում են երկրի նկատմամբ բարձր հետաքրքության և ուշադրության մասին, «Ամերիկայի ձայն»-ի հայկական ծառայությանն է ասել վերջերս Հայաստան այցելած կոնգրեսական պատվիրակության ղեկավար, ԱՄՆ Ներկայացուցիչների պալատի Ժողովրդավարական գործընկերության հանձնախմբի նախագահ Դեյվիդ Փրայսը:«Հայաստանի խնդիրները իր հարևանների հետ, ինչպես նաև Հայաստանի կայուն ժողովրդավարական զարգացումը գրավել է մեր ուշադրությունը: Մեր պատվիրակությունը, մի գուցե, չուներ այն բարձրաստիճան կարգավիճակը՝ համեմատած խոսնակ Փելոսիի այցի հետ, սակայն նման ներգրավվածությունն արդեն շարունակվում է երկար ժամանակ է»,- նշում է նա:
Կոնգրեսական Փրայսը շեշտում է՝ Հայաստանն ավելի քան երկու տասնյակ երկրների խորհրդարանների շարքում է, որոնց հետ առկա է ուղիղ ներգրավվածություն, իր գլխավորած Ժողովրդավարական գործընկերության հանձնախմբի շրջանակում:
«Կոնգրեսական մեր պատվիրակության այցը հետապնդում էր ոչ միայն երկկողմանի խնդիրների քննարկում, այլ նաև ինստիտուցիոնալ փոխգործակցություն»,- պնդում է Փրայսը:
Հայաստան այցելած պատվիրակության մեկ այլ կոնգրեսական Էնդրյու Լևինը ևս կարևորում է ամերիկացի օրենսդիրների, հատկապես խոսնակ Նենսի Փելոսիի այցերը Հայաստան:
«Կարծում եմ՝ դա ի ցույց է դնում, որ ԱՄՆ Կոնգրեսը շատ հետաքրքրված է Հայաստանով, աջակցում է Հայաստանին, ողջունում և խրախուսում է Հայաստանի ժողովրդավարության զարգացումը և սկզբունքները»,- շեշտում է կոնգրեսական Լևինը:
Կոնգրեսականներին մտահոգում է Հայաստանի սահմանին տիրող իրավիճակը :
«Մենք շատ մտահոգված ենք Հայաստանի տարածքային ամբողջականության պաշտպանության հարցով: Մեզ համար անընդունելի են Հայաստանի տարածքի վրա հարձակումները, ներխուժումը կամ այլ խնդիրներ, որոնք ստեղծում է այստեղ Ադրբեջանը»,- պնդում է Լևինը:
«ԱՄՆ-ի դիրքորոշումն է, որ Ադրբեջանը պետք է զերծ մնա Հայաստանի տարածք ցանկացած ներխուժումից: Անընունելի են տեսանյութերում պատկերված ադրբեջանցիների վերաբերմունքը գերիների հանդեպ: Բոլոր կողմերը պետք է աշխատեն Մինսկի խմբի գործընկերների և այլ միջնորդների հետ՝ կայուն խաղաղության համաձայնագրին հասնելու համար»,- հայտարարում է Փրայսը:
Օրենսդիրները վստահեցում են՝ ըմբռնումով ենք մոտենում Հայաստանի առջև ծառացած մարտահրավերներին: Կոնգրեսական Լևինը կարծում է, որ Հայաստանում առկա է մտահոգություն, որ Ռուսասատանը չի պաշտպանել Հայաստանին ադրբեջանական հարձակամումից գոյություն ունեցող պայմանագրերի հիման վրա:
«Խնդիր չէ, եթե Հայաստանը ցանկանում է բարեկամ լինել ու հարաբերություններ ունենալ Ռուսաստանի հետ: Մենք պարզապես ասում ենք, որ ցանկանում ենք ևս օգնել Հայաստանին պաշտպանվել»,- ասում է Լևինը:
«Միացյալ Նահանգները երբեք չի պնդել, որ մեզ հետ բարեկամական և աջակցող հարաբերությունները բացառում են բարեկամական հարաբերություններ տարածաշրջանի այլ երկրների հետ։ Դա իրատեսական չէ: Մենք հասկանում ենք, որ Հայաստանը վերջին մի քանի տարիների ընթացքում ունեցել է շատ դժվար ժամանակաշրջան և հիմքեր ունի կասկածի տակ դնելու անվտանգության ոլորտում իր որոշ պայմանավորվածությունների արդյունավետությունը»,- շեշտում է Փրայսը:
Կոնգրեսական Փրայսի խոսքով էլ Ռուսաստանի սանձազերծած անհիմն պատերազմն ընդդեմ Ուկրաինայի շեղել է Մոսկվայի ուշադրությունը այլ տարածաշրջաններից:
«Մենք տպավորված ենք, որ ներկա պայմաններում, ներառյալ Ադրբեջանի հետ վերսկսված հակամարտությունը, Հայաստանը հավատարիմ է մնացել ժողովրդավարական զարգացման ուղուն, ինչպես նաև ամրապնդել բարեկամական հարաբերությունները մեր երկրի հետ: Մենք ցանկանում ենք պատասխանել նույն կերպ»,- շեշտում է Փրայսը:
Խոսելով հայ-ամերիկյան ռազմական հարաբերությունների հնարավոր խորացման մասին՝ կոնգրեսական Լևինը շեշտում է՝ Հայաստանն ինքնիշխան երկիր է և ինքը պետք է որոշի, թե որն է իր առաջընթացի լավագույն ուղին:
«Մենք հարգում ենք Հայաստանի ինքնիշխանությունը և հասկանում, թե ինչպիսին է դրա աշխարհագրական դիրքը: Մենք այստեղ ենք և մեկնում ենք մեր բարեկամության ձեռքը՝ պատրաստակամություն հայտնելով օգնելու Հայաստանին»,- նշում է Լևինը:
Նրա պնդմամբ ինչպես ԱՄՆ Կոնգրեսում, այնպես էլ վարչակազմում առկա է ցանկություն՝ քննարկելու Հայաստանի հետ հարաբերությունների հետագա խորացման հարցը:
