«Որքան շուտ հեռանա, այնքան լավ կլինի». Ադրբեջանի ԱԳՆ-ն Ռուբեն Վարդանյանից պահանջում է լքել Լեռնային Ղարաբաղը
Ադրբեջանը Արցախի պետնախարար Ռուբեն Վարդանյանից պահանջում է հեռանալ Լեռնային Ղարաբաղից։ Այս մասին հայտարարել է ԱԳ նախարար Ջեյհուն Բայրամովը ռուս գործընկեր Սերգեյ Լավրովի հետ բանակցությունների ժամանակ, գրում է ՏԱՍՍ-ը։«Վարդանյանի գործունեությունը կրում է հանցավոր և արկածախնդիր բնույթ: Մենք կարծում ենք, որ դրան պետք է վերջ տալ: Եվ որքան շուտ այս մարդը հեռանա այս տարածաշրջանից, այնքան լավ կլինի բոլորի համար։ Առաջին հերթին տուժում է տեղի բնակչությունը»,- ասել է Բայրամովը և Ռուբեն Վարդանյանին տարածաշրջանի համար «օտար տարր» անվանել։
Ըստ Բայրամովի՝ Վարդանյանի գործունեությունը «խոչընդոտում է տեղի բնակչության վերաինտեգրմանը»։ «Հետևաբար, մինչ նրա հայտնվելը, արդեն եղել են դրական շփումներ այս ուղղությամբ, եղել են դրական նախագծեր, և մենք կարծում ենք, որ նրա գործոնն այսօր շատ վնասակար է և ապակայունացնող»,- ընդգծել է նա:
Վերջինս կոչ է արել բոլոր շահագրգիռ կողմերին իրենց ներդրումն ունենալ հայ բնակչության վերաինտեգրման գործում՝ հավելելով, որ ադրբեջանական կողմը պատրաստ է շարունակել քայլեր ձեռնարկել այդ ուղղությամբ։
