Պուտինի կամ նրանից հետո եկողի խոսքին հավատալ չի կարելի անգամ պատերազմի ավարտից հետո․ Նուլանդ
Անկախ այն բանից, թե ինչպես կավարտվի ռուս-ուկրաինական պատերազմը, անհրաժեշտ է երաշխավորել, որ Ռուսաստանը նորից պատերազմ չի սանձազերծի, հայտարարել է ԱՄՆ պետքարտուղարի քաղաքական հարցերով տեղակալ Վիկտորյա Նուլանդը։ BBC-ի հաղորդմամբ՝ Նուլանդը կարծում է, որ Պուտինի կամ նրանից հետո եկողի խոսքին հավատալ չի կարելի անգամ պատերազմի ավարտից հետո։«Մենք ոչ մի դեպքում չպետք է հավատանք, քանի դեռ Վլադիմիր Պուտինը կամ նրա նման մեկը իշխանության է, որ այն իսկապես ավարտված է: Նույնիսկ եթե արդար խաղաղություն ձեռք բերվի, դեռևս անհրաժեշտ կլինի երկարաժամկետ ծրագիր և ապագայի ուկրաինական բանակի կառուցում, որը կարող է հետ պահել Պուտինին ապագայում ինչ-որ բան ծրագրելու մտքից», ասել է Նուլանդը։
Պատասխանելով հարցին, թե արդյոք Վաշինգտոնը վախենում է հատել Կրեմլի կողմից գծված ցանկացած «կարմիր գիծ»՝ աջակցելով Ուկրաինային, մասնավորապես, եթե Կիևը որոշի ռազմական ճանապարհով վերադարձնել Ռուսաստանի կողմից 2014 թվականին զավթված Ղրիմը, ամերիկացի պաշտոնյան ասել է, որ ԱՄՆ-ը երբեք չի ճանաչել Ղրիմը Ռուսաստանի կազմում, և Ուկրաինային է պատկանում իր տարածքը միջազգայնորեն ճանաչված սահմաններում։
