Սամվել Բաբայանը կարող է իրավիճակը շտկել Ղարաբաղում , ոչ թե իշխանություն վերցնի ու նորից ամեն ինչ բարդի Հայաստանի վրա
Սամվել Բաբայանը կարող է իրավիճակը շտկել Ղարաբաղում եւ պատասխանատվություն վերցնել: Այսօր լրագրողների հետ զրույցում նման կարծիք հայտնեց ԱԺ «Քաղաքացիական պայմանագիր» խմբակցության պատգամավոր Գագիկ Մելքոնյանը և հավելում․ «Ոչ թե իշխանություն վերցնի ու նորից ամեն ինչ բարդի Հայաստանի վրա, Հայաստանի իշխանությունների վրա»:Վերջինս նշեց, որ ըստ մամուլի և իրենց փորձագետների՝ Ռուբեն Վարդանյանը գործուղվել է Մոսկվայի կողմից, որպեսզի նաեւ դառնա Արցախի նախագահը:
«Բայց քանի որ չստացվեց, ԼՂ իշխանություններն իրեն պաշտոնից հանելու են»,-ասաց նա:
Ինչ վերաբերում է լուրերին, որ ՀՀ իշխանությունները Սամվել Բաբայանին են գործուղել Արցախ, որ նա զբաղեցնի պետնախարարի պաշտոնը, վերջինս էլ երեկ հայտարարել է, որ իրեն 100 օր է պետք Արցախում իրավիճակը շտկելու համար, Գագիկ Մելքոնյանն ասաց, որ Սամվել Բաբայանը Արցախում մեծությամբ երկրորդ կուսակցության նախագահն է, ով ցանկացած պահի կարող է լինել Արցախում եւ զբաղվել իր կուսակցության խնդիրներով:
«Ինչ վերաբերում է Հայաստանին, Հայաստանը չի գործուղել Սամվել Բաբայանին՝ գնալ Արցախ, ինչ-որ պաշտոնների: Ուղղակի Սամվել Բաբայանն ասաց՝ 100 օր ինձ նշանակեք ԼՂ ոչ թե առաջին դեմք, այլ երկրորդ, եւ ես 100 օրում փոփոխություն կմտցնեմ թե ժողովրդի կյանքում, թե բանակցությունների հետ կապված: Ես 100 օրում ցույց կտամ, որ կարող ուժ եմ դա անելու: Ես հավատում եմ, որ Սամվել Բաբայանը կարող է դա կազմակերպել, որ թե իշխանությունը, թե ժողովուրդը միասնական լինեն»:
Գագիկ Մելքոնյանը համոզմունք հայտնեց, որ Սամվել Բաբայանի դեպքում Ադրբեջանը կհամաձայնի բանակցել Արցախի հետ. «Մինչեւ էսօր ԼՂ իշխանությունները միշտ պատասխանատվությունն իրենց վրայից գցել են: Թող պատասխանատվություն մեկը վերցնի իր վրա, որը կարող է թե ժողովրդի, թե ամեն ինչի համար պատասխանատվություն կրել: Իրենց համար ամենահեշտն այն է, որ մեղքը գցեն Հայաստանի վրա: Ամեն ինչու մեղքը գցում են Հայաստան վրա, այն դեպքում, երբ Հայաստանն ասում է, որ միջազգային կառույցների մասնակցությամբ պետք է Ստեփանակերտը բանակցի Բաքվի հետ: Իրենք խուսափում են, փախչում են, ո՞ւր պետք է փախչեն: Ասում են՝ Հայաստանը պետք է գա: Բայց Հայաստանի մտնելու դեպքում էլ արդեն Հայաստանի տարածքների բազար է լինելու, կորուստ է լինելու: Ամբողջ աշխարհն իրենց ասում է՝ եկեք նստեք բանակցեք մեր ներկայությամբ: Իսկ Սամվել Բաբայանն ասում է՝ ես կարող եմ բանակցել: Վերջապես ԼՂ իշխանությունները պետք է մի պատասխանատվություն վերցնե՞ն իրենց վրա, թե՞ միայն Հայաստանից գումարներ ստանալն ու դա ծախսելն է: Բա պատասխանատվություն կրեք: Երկու տարի անցել է, գոնե մի գազապաստարան սարքեիք, պաշարներ ստեղծեիք»,-ասաց ՔՊ-ական պատգամավորը:
