ՊՆ-ն, ԱԱԾ-ն կարող էին ճանապարհին ժամանակավոր լարային արգելափակոց տեղադրել, դա կկանգնեցներ ադրբեջանցիներին.
ՀՀ ԶՈՒ զինծառայողներն իրենց խնդիրը կատարում ու հերոսություններ են ցուցաբերում:ԱԺ-ում լրագրողների հետ ճեպազրույցում, անդրադառնալով ապրիլի 11-ին իրականացված ադրբեջանական հերթական սադրանքին, ասաց Ազգային ժողովի «Հայաստան» խմբակցության ղեկավար Սեյրան Օհանյանը:
«Մենք մեր աջակցությունն ենք հայտնում մեր Զինված ուժերին, ուժային կառույցներին՝ իրենց առջև դրված խնդիրն իրականացնելու համար»,-ասաց Օհանյանը:
Նա ընդգծեց՝ հրապարակված տեսանյութում էլ երևում է, թե ինչպես են ադրբեջանցիները մոտենում ու հրահրող գործողություններ իրականացնում:
«Որքան էլ 44-օրյա պատերազմից հետո մենք խոսում ենք ԶՈՒ մարտունակության անկման մասին, սակայն, այնուամենայնիվ, փորձը ցույց է տալիս, որ որոշ տեղային հատվածներում, որոշ ստորաբաժանումներում մեր զինծառայողներն իրենց խնդիրը կատարում են ու հերոսություններ են ցուցաբերում»,-ասաց Օհանյանը:
Նա նկատեց նաև, որ նախորդ օրը գործընթացը տեղի է ունեցել Հայաստանի և Արցախի հետ կապող միջանցքի շրջանակում: 2020-ի նոյեմբերի 9-ի փաստաթղթով նախատեսված է 3 տարվա ընթացքում ճանապարհի նախագիծ կազմել ու կառուցել այդ այլընտրանքային ճանապարհը: «Ադրբեջանն այդ այընտրանքային ճանապարհը ժամանակից շուտ է կառուցել: Ինչո՞ւ մեր իշխանությունները մեր հատվածը ժամանակին չեն կառուցել»,-հարցրեց Օհանյանը:
Ընդդիմադիր խմբակցության ղեկավարը մեղադրեց նաև իշխանությանը՝ ժամանակին պլանավորում ու կազմակերպում չիրականացնելու մեջ, եթե կար պայմանավորվածություն, որ ապրիլի 1-ին արդեն ճանապարհը պետք է պատրաստ լինի ու երթևեկությունն էլ նոր ճանապարհով լինի, ու դիրքային փոփոխություններ լինեն:
Անդրադառնալով կոկրետ նախորդ օրվա ադրբեջանական սադրանքին, նրանց մոտենալը կանխելու հնարավորությանը՝ Օհանյանն ասաց, որ գոյություն ունեն նախազգուշացնող, նաև ժամանակավոր կահավորվածություն պահանջող ինժեներական սարքավորումներ ստեղծելու հնարավորություններ, կան ականապայթյունային և ոչ ականապայթյունային ինժեներական սարքավորումներ: Ըստ նրա՝ ՊՆ-ն, ԱԱԾ-ն կարող էին ճանապարհին ժամանակավոր լարային արգելափակոց տեղադրել, տեղադրումն էլ րոպեների խնդիր է: «Դա կկանգնեցներ, նրանք չէին մոտենա մեր դիրքերին: Եթե իրենց մեքենան կանգնեցներ, մեր զինվորականներն արդեն կմտնեին խրամատներն, ավելի անվտանգ կլինեին, իսկ 1-2 հոգի կբանակցեին, մնացածն իրենց նշանառության, դիտարկման տակ կվերցնեին հակառակորդի զինծառայողներին»,-ասաց նա՝ կարծիք հայտնելով, որ կանխել հնարավոր էր:
Օհանյանը Հայաստանի իշխանությանը խորհուրդ տվեց լուրջ հետևություններ անել ու դրանց շրջանակում կազմակերպել պաշտպանությունը, սահմանների ինժեներական կահավորումը և մնացած բոլոր անվտանգային խնդիրները:
