Ինչո՞ւ հանկարծ չեղարկվեց Նիկոլ Փաշինյանի՝ Քիշնևի հայ համայնքի հետ հանդիպումը․ «Հրապարակ»
«Հրապարակ»-ը գրում է․ «Նիկոլ Փաշինյանը չեղարկել է հանդիպումը Քիշնևի հայ համայնքի հետ։ Այս մասին «Հրապարակի» հետ զրույցում տեղեկացրեց Մոլդովայի Քիշնևի հայկական սփյուռքի համայնքի ղեկավար Վեներա Մուշեղը։ Նա նշեց, որ տեղյակ չէ, թե հանդիպումը ինչու է չեղարկվել, սակայն որոշ մանրամասներ հայտնեց։«Հանդիպմանը ներկայացվածների շարքում ամենաառաջինը իմ անունն է նշված եղել՝ որպես մեր սփյուռքի համայնքի ղեկավար, սակայն անվանս վրա գիծ են քաշել ու հայտարարել, որ ես կատեգորիկ չպետք է ներկա գտնվեմ։ Ես էլ ասել եմ, որ ես եմ այստեղ հայությունը ներկայացնումո՞նց չպիտի մասնակցեմ։ Ես հարցեր ունեմ իրեն տալու, ինչու չպիտի մասնակցեմ»,-ասաց Վեներա Մուշեղը։
Մոլդովայի հայկական սփյուռքի ղեկավարը տեղեկացրեց, որ զգուշացրել է, որ եթե նույնիսկ իր մասնակցությունն անընդունելի են համարում՝ ոչ ոք իրեն չի կարող կանգնեցնել և զգուշացրել է՝ փորձ չանեն խանգարել իրեն։
«Ասեցի՝ թող համարձակվի մեկը կանգնի ասի՝ չեմ թույլատրում։ Մոտ մեկ ժամ առաջ՝ քառասուն րոպե առաջ, զանգեցին ասեցին հանդիպումը չի լինելու ։ Հանդիպումը լինելու էր Մանուկ Բեյ Միրզոյանի տուն-թանգարանում, որը հայկական համայնքին ես եմ վերադարձրել՝ Մոլդովայի նախորդ վարչապետի օգնությամբ։ Հանդիպումը պետք է այնտեղ կայանար՝ ամսի երկուսին՝ ժամը տասին։ Զանգում են, ասում, Մուշեղովնա, հանդիպումը չի լինելու, հրաժարվել են, չեն ուզւոմ համայնքի հետ հանդիպել»,-տեղեկացրեց վերջինս։
Վեներա Մուշեղը ասաց, որ Նիկոլ Փաշինյանը ՔԻշնև է ժամանել կնոջ և դստեր հետ ու ասաց, որ դեռևս չեն որոշել, թե ինչ քայլեր են ձեռնարկելու։ Նա չբացառեց նաև, որ միգուցե հանդիպումը չեղարկելու մասին լուրը հատուկ է արվել, որպեսզի հետո Փաշինյանն իր համակիրներով կարողանա հանդիպում ունենալ՝ զերծ մնալով անհարմար հարցերից ու իրավիճակներից»։
Առավել մանրամասն՝ թերթի այսօրվա համարում
