Մենք չպետք է թերագնահատենք թշնամուն, նրան աջակցող արևմտյան աշխարհը պատրաստ են ամեն ինչի մեր երկիրը Երկրի երեսից ջնջելու համար, արժանի պատասխան պետք է տալ
Ռուսաստանի Դաշնության Անվտանգության խորհրդի փոխնախագահ Դմիտրի Մեդվեդևը կարծում է, որ ռուսները չպետք է թերագնահատեն Ուկրաինայի Զինված ուժերի սկսած հակահարձակումը։ Նրա կարծիքով՝ անհրաժեշտ է «արժանապատիվ պատասխան» տալ Ուկրաինայի զինված ուժերի հարձակողական գործողություններին։«Մենք չպետք է թերագնահատենք թշնամուն: Թշնամին ու նրան աջակցող արևմտյան աշխարհը պատրաստ են ամեն ինչի մեր երկիրը Երկրի երեսից ջնջելու համար։ Ուստի հիմա գլխավորը հնարավորինս կենտրոնանալն ու արժանի պատասխան տալն է»,- գրել է քաղաքական գործիչը Telegram-ի իր ալիքում։
Դմիտրի Մեդվեդևն ասել է, որ ուկրաինական հակահարձակումը Ռուսաստանի համար անակնկալ չի եղել, և ՌԴ ԶՈւ-ն առավելություն ունի Ուկրաինայի Զինված ուժերի նկատմամբ «ավիացիայում, ճշգրիտ սպառազինության, զրահատեխնիկայի հարցերում»։
Նա կարծում է, որ ուկրաինական բանակի հակահարձակումը հետ մղելուց հետո ռուս զինվորականները պետք է իրենք սկսեն հարձակողական գործողություններ։
Ռուսաստանի Դաշնության պաշտպանության նախարարությունը հայտարարել է, որ Ուկրաինան հունիսի 4-ի առավոտյան լայնածավալ հարձակում է սկսել հարավդոնեցկյան ուղղությամբ։ ՌԴ ռազմական գերատեսչության տվյալներով՝ Ուկրաինայի զինված ուժերի հարձակողական գործողություններն ավարտվել են անհաջողությամբ, իսկ ուկրաինացի զինվորականները «հետ են շպրտվել»։
Ուկրաինայի պաշտպանության նախարարությունը նույնպես հայտնել է «հարձակողական գործողությունների» մասին, սակայն այլ ուղղությամբ՝ Բախմուտի։ Միաժամանակ, Ուկրաինայի նախագահի գրասենյակի ղեկավարի խորհրդական Միխայիլ Պոդոլյակը հայտնել է, որ հարձակումը դեռ չի սկսվել։
Հունիսի 6-ին ՌԴ պաշտպանության նախարար Սերգեյ Շոյգուն ասել է, որ «վերջին երեք օրվա ընթացքում Կիևի ռեժիմը խոստացված հարձակումն է իրականացրել ռազմաճակատի տարբեր հատվածների վրա։ Հունիսի 4-ին Ուկրաինայի զինված ուժերի՝ երկու բրիգադների ուժերով հինգ ուղղություններով առաջխաղացման փորձը հաջողությամբ չի պսակվել։ Հունիսի 5-ին հակառակորդը հինգ բրիգադի ուժերով յոթ ուղղություններով հարձակման նոր փորձեր է ձեռնարկել, սակայն կասեցվել է և զգալի կորուստներ կրել։
