Իրանը Ղարաբաղը համարում է Ադրբեջանի մաս.Ադրբեջանը մեզ հաղորդագրություն է ուղարկել, որ ռազմական հարձակման մտադրություն չունի․ Իրանի ԱԳՆ
Իրանը Ղարաբաղը համարում է Ադրբեջանի մաս. այդ մասին մամուլի ասուլիսում հայտարարել է Իրանի արտաքին գործերի նախարարության մամուլի քարտուղար Նասեր Քենանին՝ պատասխանելով սեպտեմբերի 9-ին Արցախում անցկացրած նախագահի ընտրության մասին հարցին, փոխանցում է MehrNews-ը:«Իրանի դիրքորոշումը հստակ է, կայուն և թափանցիկ: Իրանի դիրքորոշումը Ղարաբաղի տարածքի վերաբերյալ ոչ մեկի համար գաղտնիք չէ: Ղարաբաղը Ադրբեջանի Հանրապետության մաս է, և այս տարածաշրջանի բնակիչների իրավունքներն ու անվտանգությունը պետք է սահմանվեն և ապահովվեն ներսում. սա մեր հստակ դիրքորոշումն է: Մենք միշտ ընդգծում ենք երկրների տարածքային ամբողջականությունը, ազգային ինքնիշխանությունը հարգելու և լարվածություն ստեղծող գործողություններից զերծ մնալու կարևորությունը»,- ասել է Քենանին։
ԱԳՆ խոսնակը հավելել է, որ Իրանը դեմ է միջազգայնորեն ճանաչված սահմանների ցանկացած փոփոխության։
***
Իրանի արտգործնախարարության մամուլի քարտուղար Նասեր Քանանին մամուլի ասուլիսի ժամանակ Հարավային Կովկասում լարվածության առնչությամբ նշել է.
«Հայաստանի պաշտոնյաները մտահոգություն են հայտնել Ադրբեջանի կողմից հնարավոր հարձակման կապակցությամբ, սակայն Ադրբեջանի պաշտոնյաները մեզ հաղորդագրություն են ուղարկել, որ ռազմական հարձակման մտադրություն չունեն»,- ասել է ԱԳՆ ներկայացուցիչը։
Նա ընդգծել է, որ Իրանի սահմաններն ապահով են, իսկ Իսլամական Հանրապետությունը պաշտպանում է իր սահմանների անվտանգությունը։
«Իրանը միշտ ընդգծել է երկրների տարածքային ամբողջականությունը հարգելու անհրաժեշտությունը և միշտ դեմ է արտահայտվել միջազգայնորեն սահմանված սահմանների ցանկացած փոփոխության: Հայաստանի և Ադրբեջանի կողմից միմյանց տարածքային ամբողջականության ճանաչումը կարևոր քայլ կլինի կայուն խաղաղության և անվտանգության հասնելու համար: Մի սատարեք որևէ գործողության, որը կարող է ստվեր գցել այս սկզբունքների վրա»,- ասել է Քանանին։
