Օկուպացված հայկական Հադրութի շրջանում ադրբեջանցիներ են զոհվել. մեղադրել են հայկական կողմին
Ադրբեջանի կողմից օկուպացված հայկական Հադրութի շրջանում, պետական մայրուղու վրա, ականի վրա բեռնատար է պայթել, որի հետևանքով մահացել են բեռնատարի վարորդն ու ուղևորը։ Այս մասին հայտնել են ադրբեջանական ԶԼՄ-ները՝ երկրի ՆԳՆ մամուլի ծառայության հղումով։Ադրբեջանի պետական ավտոմոբիլային գործակալությունը (AAYDA) հաստատել է իր երկու աշխատակիցների մահը՝ նշելով, որ պետական գործակալությանը պատկանող Howo բեռնատարն աշխատել է Ֆիզուլի-Շուշի ճանապարհին և պայթեցվել է հակատանկային ականով։
Ադրբեջանական կողմը, ինչպես և սպասվում էր, ականի տեղադրման համար մեղադրել է հայկական կողմին՝ նշելով, թե տեղի ունեցածն, իբր, «հայկական զինված անօրինական ուժերը դիվերսիայի արդյունք է, որն իրականացվել է ռուս խաղաղապահների տեղակայման գոտում»։
ՆԳՆ-ից հայտնել են, որ միջադեպի առթիվ կատարվում է քննություն, հարուցվել է քրեական գործ։
