Ըստ ադրբեջանական աղբյուրների՝ Ադրբեջանի արտակարգ իրավիճակների ծառայությունը Աղդամում, Ֆիզուլիում և Քելբաջարում «վրանային ճամբարներ է տեղակայել հայ բնակչության համար
Ըստ ադրբեջանական աղբյուրների՝ «պայմաններ են ստեղծվում» Արցախից Հայաստան բժշկական տարհանումներ իրականացնելու համար։«ԿԽՄԿ-ի դիմումի հիման վրա անհրաժեշտ հնարավորություններ են ստեղծվում բժշկական օգնության կարիք ունեցող անձանց Հայաստան տարհանելու համար»,- հայտնում է ադրբեջանական ԱՊԱ գործակալությունը՝ վկայակոչելով այդ երկրի կառավարության հաղորդագրությունը։
Աղբյուրի համաձայն՝ Ադրբեջանի արտակարգ իրավիճակների ծառայությունը Աղդամում, Ֆիզուլիում և Քելբաջարում «վրանային ճամբարներ է տեղակայել հայ բնակչության համար»։ Հազար հոգու համար նախատեսված այդ ճամբարներում, ինչպես հաղորդվում է, առաջին բուժօգնություն կցուցաբերեն Ադրբեջանի ոստիկանության աշխատակիցները, զինծառայողներն ու քաղաքացիական ծառայողներ։
Ստեփանակերտն այս տեղեկությունները չի հաստատել։
Ադրբեջանական լրատվամիջոցների համաձայն՝ Ադրբեջանի նախագահի հանձնարարությամբ փոխվարչապետ Շահին Մուստաֆաևի ղեկավարությամբ աշխատանքային խումբ է ստեղծվել, որն զբաղվելու է Լեռնային Ղարաբաղում «սոցիալական, հումանիտար, տնտեսական և ենթակառուցվածքային խնդիրների լուծմամբ»։
