Իսրայելի բնակելի թաղամասերում ծանր տեխնիկայի կիրառումը բարդ խնդիր է՝ հղի բոլոր կողմերի համար լուրջ հետեւանքներով
Իսրայելը ենթարկվել է դաժան հարձակման, սակայն կարգավորումը հնարավոր է միայն անկախ Պաղեստինի ստեղծման միջոցով, որի մայրաքաղաքը Արևելյան Երուսաղեմն է: Այս մասին ԱՊՀ գագաթնաժողովում հայտարարել է ՌԴ նախագահ Վլադիմիր Պուտինը։Նրա խոսքով՝ Ռուսաստանը ելնում է «այն ենթադրությունից, որ պաղեստինա-իսրայելական հակամարտությունը բանակցությունների միջոցով լուծելն այլընտրանք չունի»։
«Նրանց նպատակը պետք է լինի ՄԱԿ-ի «երկու պետություն» բանաձևի իրականացումը, որը ներառում է անկախ պաղեստինյան պետության ստեղծում՝ Արևելյան Երուսաղեմ մայրաքաղաքով, խաղաղ և անվտանգ գոյակցող Իսրայելի հետ: Իհարկե, տեսնում ենք, որ Իսրայելը ենթարկվել է իր դաժանությամբ աննախադեպ հարձակման և, իհարկե, ունի պաշտպանության իրավունք, իրավունք ունի ապահովելու իր խաղաղ գոյությունը»,- ասել է Պուտինը։ «Այս իրավիճակում, այս վայրում ինձ թվում է, որ [երկու անկախ պետություններին] այլընտրանք պարզապես չկա»։
Նրա խոսքով՝ Իսրայելի կողմից ծանր տեխնիկայի օգտագործումը Գազայում ցամաքային գործողության շրջանակներում բնակելի թաղամասերում բարդ խնդիր է, որը հղի է լուրջ հետեւանքներով։ «Մենք լսում ենք Գազայում ցամաքային գործողության նախապատրաստման ծրագրերի մասին: Բայց մենք ձեզ հետ հասկանում ենք, որ բնակելի թաղամասերում ծանր տեխնիկայի կիրառումը բարդ խնդիր է՝ հղի բոլոր կողմերի համար լուրջ հետեւանքներով։ Իսկ առանց տեխնիկայի նույն բնակելի շենքերում էլ ավելի դժվար է նույն գործողություններն իրականացնելը»,- ասել է Պուտինը։
