13-ամյա Մկոն ահաբեկիչ չէր, ոչ էլ նրա 16-ամյա եղբայրը, որ սպանվեց ադրբեջանցիների կողմից

Միջազգային հայտնի լրագրող Լինդսի Սնելը, որ լուսաբանում է զինված հակամարտություններն ու դրանց հետևանքները, X սոցցանցի իր միկրոբլոգում արձագանքել է ադրբեջանցիների այն հայտարարություններին, որ իրենք Լեռնային Ղարաբաղում սպանել են ահաբեկիչների։

Լինդսի Սնելը հրապարակել է 13-ամյա երեխայի լուսանկարն ու գրել.

«Անցած ամիս Մարտակերտի վրա ադրբեջանական գնդակոծության հետևանքով 13-ամյա Մկոյի մարմնի մեջ 200 բեկոր է մնացել և կոլոստոմիայի պարկը։ Նա ահաբեկիչ չէ։ Նրա 16-ամյա եղբայրը, ով նույնպես ահաբեկիչ չէ, սպանվել է»,-գրել է նա։

Ավելի վաղ լրագրողը հրապարակել էր երեխաների մոր՝ Գոհարինե Գրիգորյանի լուսանկարը, որտեղ նրա ձեռքերը գիպսի մեջ են։

«Գոհարինե Գրիգորյանը պաշար էր հավաքում ապաստարան գնալու համար, երբ Ադրբեջանը գնդակոծեց Մարտակերտի նրա տունը։ Նրա 13-ամյա որդին նույնպես ծանր վիրավորվել է։ Նրա 16-ամյա որդին սպանվել է. Ադրբեջանը չի բախվել Լեռնային Ղարաբաղի վրա սանձազերծած սարսափների հետևանքների հետ»։