2050թ. լյարդի ոչ ալկոհոլային ճարպային հիվանդության տարածվածությունը կավելանա՝ հասնելով 34,3 տոկոսի
Համաձայն հետազոտության արդյունքների, որոնք ներկայացվել են լյարդի հիվանդությունների ուսումնասիրման The Liver Meeting ամերիկյան ասոցիացիայի կողմից Բոստոնում, նոյեմբերի 10-14-ին, կանխատեսվում է լյարդի ոչ ալկոհոլային ճարպային հիվանդության (ԼՈԱՃՀ) տարածվածության հետագա ավելացում, գրել է Medical Xpress-ը։Դոկտոր Ֆուկ Լեն Քլիվլենդի կլինիկայից եւ նրա գործընկերները մշակել են այն վիճակների անցման մոդելը, որը ներառում է երկու բաղադրիչ տարեկան ցիկլով՝ ԱՄՆ բնակչության մոդելավորում 2000 թվականից՝ մարդահամարի տվյալների հիման վրա, եւ մեծահասակների ԼՈԱՃՀ զարգացման բնական պատմության ուսումնասիրում, որը ներառում է առողջական 14 տարբեր վիճակներ։
Մոդելի վալիդացումը ցուցադրել է 2000-2018թթ. կանխատեսվող ելքերի սերտ համապատասխանություն հրապարակված տվյալներին։ Հետազոտողները հայտնաբերել են, որ մոդելը կանխատեսում է ԼՈԱՃՀ տարածվածության կայուն աճ ԱՄՆ մեծահասակ բնակչության շրջանում 2020-2050թթ. (27,8-իվ 34,3 տոկոսի)։ Սպասվում է, որ ոչ ալկոհոլային ստեատոհեպատիտի (լյարդի պարենխիմայի բորբոքում, որը խորացնում է լյարդի ճարպային փոխակերպումը- խմբ.) բաժինը ԼՈԱՃՀ հիվանդների շրջանում 20,0-ից կհասնի 21,8 տոկոսի։
18-29 տարեկանների շրջանում հիվանդության տարածվածությունը պետք է մնա համեմատաբար կայուն, սակայն այլ տարիքային խմբերում կանխատեսվում է զգալի աճ։ 2020-2050թթ. ԼՈԱՃՀ հիվանդների բաժինը, որոնց մոտ կառաջանա լյարդի ցիռոզ, կավելանա՝ 1,9-ից հասնելով 3,1 տոկոսի։ Սպասվում է, որ լյարդի հիվանդության հետ կապված մահացությունը մահերի ընդհանուր թվում կավելանա՝ 0,4-ից հասնելով 1,0 տոկոսի։
Ըստ կանխատեսումների՝ 2050թ. ԼՈԱՃՀ-ն կդառնա լյարդի տարեկան փոխպատվաստումների 4 200 նոր դեպքերի պատճառ, ինչը զգալիորե ավելին է, քան 1 700 դեպքերը 2020թ.։
