Մի ինձ բան արեք, շատ կջղայինանամ, որովհետև…Ադրբեջանն ինչ ուզել՝ մեր տարածաշրջանում արել է, իսկ Ռուսաստանը կա՛մ չի կարողացել, կա՛մ չի արձագանքել
ԱԺ նախագահ Ալեն Սիմոնյանը կարծում է, որ Ռուսաստանի կողմից Հայաստանին զենք չմատակարարելու հարցը կարող է ׇգործընկերային ձևով լուծել:«Ռուսական կողմը շանս ունի ցույց տալու, որ, այնուամենայնիվ, ինքը շարունակում է հավատարիմ մնալ իր հայտարարած սկզբունքներին ու ստորագրած փաստաթղթերին, բայց սա ոչ մի ձև չի ազդելու Հայաստանի որոշման վրա` ապահովել Հայաստանի անվտանգությունը»,- պատասխանելով Aysor.am-ի հարցին` ասաց Ալեն Սիմոնյանը:
Սիմոնյանը նշեց` փաստ է, որ Ռուսաստանը չի կատարում իր պարտավորությունները, իսկ Հայաստանը պետք է պաշտպանի իր շահերը:
Ի պատասխան մյուս հարցին` ՀԱՊԿ նիստին չմասնակցելու որոշումը ինչո՞վ է Սիմոնյանը հիմնավորել` նա ասաց, որ այդ նիստին մասնակցելու իմաստ չի տեսնում:
«Կան չլուծված հարցեր, մարդիկ չեն կատարում իրենց պարտավորությունները»,- նշեց Սիմոնյանը:
ԱԺ նախագահի խոսքով` Ադրբեջանն ինչ ուզել` մեր տարածաշրջանում արել է, ու Ռուսաստանը կա՛մ չի կարողացել, կա՛մ չի արձագանքել:
«Հիշո՞ւմ եք՝ ինչ աղմուկ բարձրացրեց Ռուսաստանը, երբ Հայաստանը հումանիտար օգնություն ուղարկեց Ուկրաինա, երբ մի քանի տարի էր` պատերազմ էր: Ադրբեջանը բազմաթիվ անգամ նման օգնություն է ուղարկել, բայց ոչ մի ծպտուն Ռուսաստանի «արդարացի» ԱԳՆ-ից», - ասաց Սիմոնյանը:
Ռուսաստանը, ըստ Սիմոնյանի, շատ ցավոտ է արձագանքում Հայաստանի պարագայում, իսկ Ադրբեջանի պարագայում ձև է անում, թե չի նկատել:
«Մի ինձ բան արեք, շատ կջղայինանամ, որովհետև…», - Ռուսաստանի վերաբերյալ հարցերին արձագանքելով` այսպես խոսքն ամփոփեց ՀՀ ԱԺ նախագահը:
