Գագիկ Գինոսյանի սիրտը չդիմացավ,...այդ անզորության զգացողությունից, ըմբոստությունից, ցասումից
Երկար տարիներ, երբ Արցախում մշակույթի նախարար էի, Գագիկ Գինոսյանի հետ համատեղ ծրագրեր ենք արել. իր շնորհիվ մենք հայկական պարը բերեցինք Արցախ: Այս մասին այսօր՝ փետրվարի 9-ին, Գագիկ Գինոսյանի վերջին հրաժեշտին լրագրողների հետ զրույցում նշեց Արցախի ԿԳՄՍ նախկին նախարար Նարինե Աղբալյանը:«Մինչեւ վերջին օրերը մենք իրար հետ միասին աշխատում էինք: Գագիկ Գինոսյանը հայրենիքի զինվոր էր, բայց նա սովորական ազատամարտիկ չէր, նա հայկական ինքնության պահապաններից էր: Ամենեւին զարմանալի չէ, որ նրա սիրտը չդիմացավ, որովհետեւ երբ այսքան թիրախավորվեց ու խոցելի դարձավ հայկական ինքնությունը, պարզ էր, որ նման մարդիկ չեն կարող անտարբեր լինել: Կարծում եմ՝ այդ անզորության զգացողությունից, ըմբոստությունից, ցասումից նրա սիրտը չդիմացավ:
Կուզենայի, որ նա հաղթահարեր այդ փորձությունը, այդ անզորության զգացողությունը, որ համակել է բոլորիս եւ կարողանայիք մեր պայքարը մինչեւ վերջ տանել»,-ասաց նա:
Նարինե Աղբալյանը վստահություն հայտնեց, որ ժամանակի հետ նրա ավանդան ավելի կգնահատվի ու կարժեւորվի մեր բոլոր սերունդների կողմից:
Հիշեցնենք, որ երկու օր առաջ սրտի կաթվածից մահացել է «Կարին» ավանդական երգի-պարի խմբի հիմնադիր և գեղարվեստական ղեկավար, Հայաստանի մշակույթի վաստակավոր գործիչ և Արցախյան պատերազմի մասնակից Գագիկ Գինոսյանը։ Նա կհուղարկավորվի «Եռաբլուր» պանթեոնում:
