Տեսանյութ. Երկու ժողովուրդների միջև ամուր կապ կստեղծվի, անցկացվեց «Համագործակցության մետաքսե գորգ» հայ-իրանական փառատոնը

Գորիսի Կենտրոնական հրապարակում տեղադրված ավելի քան 20 տաղավարներում ներկայացվեցին երկու երկրների մշակութային հարուստ ժառանգությունը, ավանդական ճաշատեսակներն ու  արվեստի արժեքավոր ցուցանմուշներ։ 

Գորիս համայնքի ղեկավար Առուշ Առուշանյանը և Սյունիքում Իրանի Իսլամական Հանրապետության հյուպատոս Մորթեզա Աբեդին Վարամինը կտրեցին մետաքսե գորգը` ազդարարելով «մետաքսե համագործակցության» և տոնական մեծ միջոցառման մեկնարկը։ 

«Գորիսում հաճախ են կազմակերպվում տարատեսակ փառատոններ։ Հայ-իրանական համատեղ փառատոնի մեկնարկը դրվեց այսօր։ Հյուպատոսի հետ պայմանավորվածություն ունենք, որ ավելի հաճախակի ենք կազմակերպելու նմանատիպ միջացառումներ։ Կարծում եմ` մեր երկու ժողովուրդների միջև սա ամուր կապ կստեղծի, հուսով եմ` հետագան ավելի դրական կստացվի։ Այսօր մեր հիմնական շեշտը մենք դրել ենք զբոսաշրջության վրա և դրանով էլ փորձում ենք առաջ գնալ և հենց այս միջոցառումն էլ նոր հնարավորություն է, կարծում եմ»,- լրագրողների հետ զրույցում նշեց Առուշ Առուշանյանը։ 

Սյունիքում ԻԻՀ հյուպատոսը ևս իր խոսքում կարևորեց երկու երկրների մշակութային փոխգործակցության զարգացումը` արձանագրելով, որ այն էականորեն կնպաստի նաև Հայաստանի և Իրանի երկկողմ  համագործակցության զարգացմանը` առևտրատնտեսական, մշակույթի, տուրիզմի և այլ ուղղություններով։

Համայնքապետը և հյուպատոսը նաև շրջեցին հայկական և իրանական տաղավարներով, հետաքրքրվեցին ներկայացված ցուցանմուշներով` սննդի մինչև ձեռարվեստ, պատմությունից մինչև հոգևոր ժառանգություն ու երաժշտարվեստ։

Նախաձեռնության նպատակն է ամրապնդել հայ-իրանական մշակութային կապերը և ձևավորել նոր հարթակ երկու հարևան երկրների միջև համագործաշցության խորացման համար։