Բախվել ենք իրավական կազուսի․ Ալեքսանյանը Գյումրիի քաղաքապետի ընտրության մասին
Միանշանակ քաղաքի վիճակը մեզ շատ է անհանգստացնում։ Խստորեն դատապարտելի է «Բալասանյան» դաշինքի կողմից նման վարքագիծը, որ քաղաքը մատնել են անտերության, որ դրա պատճառով քաղաքային աշխատողները աշխատավարձ չեն ստանում, փաստացի քաղաքը աղբի մեջ քիչ է մնում՝ կորի: Այս մասին լրագրողների հետ զրույցում ասաց ՔՊ-ական պատգամավոր Վահագն Ալեքսանյանը։«Այդ ամեն ինչը մեզ համար խստորեն դատապարտելի է: Ինչ վերաբերում է ՔՊ-ին, ապա ՔՊ-ն հրաժարվել է կոալիցիայի իր մասից, բայց ՔՊ-ն մանդատները վայր չի դրել, ճգնաժամ չի առաջացրել, պարզապես սկսել է աշխատել՝ որպես ընդդիմադիր»,- ասաց նա:
Ինչ վերաբերում է իշխանության կողմից ճնշումների մասին խոսակցություններին, Ալեքսանյանը հայտարարեց, թե եթե իշխանությունը որոշեր ճնշել ավագանու մեծամասնություն չկազմող խմբակցություններից մեկին, ապա կճնշեր այնպես, որ այդ խմբակցությունից մի քանի հոգի կընտրեին ՔՊ խմբակցության թեկնածուին:
Նրա խոսքով՝ իրենց խմբակցությունը հայտարարել է, որ ՔՊ կուսակցությունն ամեն ինչ անելու է, որ տեղի ունենան արտահերթ ընտրություններ, բայց բախվել են իրավական որոշակի կազուսի։
«Այնտեղ որոշակի տարընթերցումներ կան, իրավական կոլիզիա կա երկու օրենքների միջև: Հարց է առաջանում, թե ե՞րբ պետք է այդ ընտրությունները տեղի ունենան, արդյոք առհասարակ կարո՞ղ են այդ ընտրությունները տեղի ունենալ՝ առանց համայնքապետի ժամանակավոր պաշտոնակատարի, որովհետև մի շարք իրավաբաններ մեկնաբանում են, որ համայնքապետն է, որ օրինակ, պաստառների փակցնելու տեղերն է սահմանում»,- ասաց Ալեքսանյանը՝ նշելով, որ եթե չկա համայնքապետ, ապա ոչ ոք չի կարող դա անել, համայնքապետն է, որ, օրինակ, ընտրատեղամասերի հետ կապված կարգավորումներ է ստորագրում․ «Այստեղ փաստացի որոշակի կազուսի առջև ենք կանգնած»։ Ալեքսանյանը չբացառեց, որ օրենսգրքում կարող են փոփոխություններ իրականացվել։
