Կարծում եմ, մեր հանրությունը պետք է, եթե չասեմ գոհ լինի, ապա առնվազն չզայրանա սրանից, ֆինանսների նախարարը պարգևավճարների մասին
Պետական պաշտոնյաների աշխատավարձը վերջին 5-6 տարիներին, մեծ հաշվով չի փոխվել: 1-2 տարի առաջ քննարկում է եղել, որ պետք է ինչ-որ բան անել, որովհետև որակյալ մասնագետներին, որոնք մեծ հաջողության են հասել, մասնավոր հատվածում բարձր աշխատավարձ են ստանում, պետական համակարգ ներգրավելը հեշտ չէ: Դրա պատճառներից մեկն աշխատավարձն է: Այս մասին ասուլիսի ժամանակ ասել է ՀՀ ֆինանսների նախարար Վահե Հովհաննիսյանը:«Քննարկումների ժամանակ իմ դիրքորոշումը եղել է այն, որ ուղղակի բարձրացնել նախարարների, փոխնախարարների կամ ղեկավար անձնակազմի աշխատավարձը՝ այդքան ճիշտ չէ, և պետք է ներդնել մի համակարգ, որտեղ կկարողանանք որոշ թիրախներ դնել և այդ թիրախների գնահատման արդյունքով տրամադրել այդ աշխատավարձը»,-ասել է նա, հավելելով՝ այդ մեթոդով աշխատավարձի բարձրացումը բոլորի համար միևնույն ձևով չի լինի, այսինքն՝ ովքեր կունենան ավելի լավ կատարողական, նրանց համար կլինի մի փոքր ավելի բարձր, մյուսների համար՝ մի փոքր պակաս:
Նա նշել է, որ քաղաքական կամ հանրային գործունեությամբ զբաղվող մարդիկ շատ ավելի խոցելի են, և պետք է նրանց մի փոքր ավելի բարձր վճարել:
«Ես կարծում եմ, որ մեր հանրությունը պետք է, եթե չասեմ գոհ լինի, ապա առնվազն չզայրանա սրանից, որովհետև մենք հավելյալ 300 միլիարդ հարկ ենք հավաքել»,-նշել է ֆինանսների նախարարը:
