Տեղի ունեցավ Արմենակ Ուրֆանյանին նվիրված հուշ-երեկոն․ Տեսանյութ․ Լուսանկարներ

Կապիտան Արմենակ Ուրֆանյանի մայրը՝ տիկին Համեստը, որդու զոհվելուց հետո մեկնել է Արցախ՝ Մարտակերտ, որտեղ որդին ծառայություն է իրականացրել: Այս մասին էր պատմում Արմենակ Ուրֆանյանի հիշատակին նվիրված Սոնա Տոնականյանի ֆիլմը, որի ցուցադրությունը կայացավ երեկ «Մոսկվա» կինոթատրոնում:

 

Հուշ-երեկոն կազմակերպել էր «Ջավախք հայրենակցական միությունը»: Միության նախագահ Շիրակ Թորոսյանը վստահեցրեց, որ մեկ առ մեկ հիշելու են բոլոր այն հերոսներին, որոնք հերոսաբար ընկան ապրիլյան պատերազմում: Կինոթատրոնի դահլիճը լեփ լեցուն էր եւ դատարկ աթոռների բացակայության պատճառով տասնյակ քաղաքացիներ ոտքի վրա էին հետեւում իր կյանքը հայրենիքի համար զոհաբերած կապիտանի կյանքի պատմությանը: 

Hayacq.com-ի հետ զրույցում տիկին Համեստը նշեց, որ իր համար ամենամեծ անակնկալը իր որդու՝ Արմենակ Ուրֆանյանի 7 հոգանոց փոքրաթիվ անձնակազմի՝ ապրիլյան դեպքերից ողջ մնացած երեք զինծառայողներին  տեսնելն էր կազմակերպված հուշ-երեկոյին։ Վերջիններիս տիկին Համեստը գրկել և արտասվում էր՝ հավանաբար, փորձելով այդ կերպ իր զոհված տղայի կարոտն առնել։

Հիշեցնենք, որ ապրիլյան պատերազմում արիաբար զոհված Ռոբերտ Աբաջյանը, Քյարամ Սլոյանը եւ Անդրանիկ Զոհրաբյանը կապիտան Ուրֆանյանի զինվորներն են եղել: