Ինչո՞ւ է Արմեն Ջիգարխանյանը ձերբակալվել
ԽՍՀՄ ժողովրդական արտիստ, դերասան Արմեն Ջիգարխանյանի ու նրա երիտասարդ կնոջ ներընտանեկան կոնֆլիկտը` իր անսպասելի շրջադարձերով շարունակվում է:Երեկ, ուրիշի անձնական տարածք ներխուժելու փորձի մեղադրանքով ձերբակալվել է Արմեն Ջիգարխանյանը: Այս լուրը լայն տարածում էր գտել մի շարք ռուսական ԶԼՄ-ներում` պարզաբանմամբ, որ նման իրավիճակում է դերասանը հայտնվել, երբ փորձել է իր ու կնոջ համատեղ բնակարանից անձնական որոշ իրեր վերցնել: Կնոջ` Վիտալինա Ցիմբալյուկ Ռոմանովսկայայի ներկայացուցիչն անմիջապես զանգահարել է ոստիկանություն, ու քանի որ տունը գրանցված է Վիտալինայի անունով ու դերասանը չունի տան նկատմամբ որեւէ իրավունք, տուն մտնելը համարվել է որպես ուրիշի անձնական տարածքի ներխուժում:
Լուրերում նաեւ ասվում էր, որ Արմեն Ջիգարխանյանին ուղեկցել է ընկերը` բիզնեսմեն Արթուր Սողոմոնյանը, որին եւս ձերբակալել են:
Ավելի ուշ դերասանի ընկերը` ինքը Արթուր Սողոմոնյանը, մեկնաբանելով այս լուրերը նշել է, որ ձերբակալություն որպես այդպիսին չի եղել, սակայն իրավապահ մարմինների հետ եղել են բանակցություններ` նշված թեմայով: Արմեն Ջիգարխանյանը փորձել է տնից վերցնել անձնագիրը, կենսաթոշակային գրքույկն ու էլի մի քանի փաստաթղթեր, բայց դռան փականները փոխված են եղել: Քանի որ տունը Վիտալինայի սեփականությունն է, ներկա են եղել իրավապահ մարմինների ներկայացուցիչներ, որոնց հետ դերասանը դիալոգ է ունեցել ու վերադարձել թատրոն:
Նշենք, որ դերասանի ամբողջ ունեցվածքը` անշարժ եւ շարժական գույքը գրանցված է Վիտալինայի անունով, այս պահին ժողովրդական արտիստը չունի որեւէ սեփականության իրավունք իր իսկ տարիների վաստակի նկատմամբ: Իսկ բնակարանը, ուր փորձել են մտնել ինքն ու Արթուրը, ձեռք է բերվել համատեղ ամուսնության ընթացքում, նրանք վաճառել են իրենց նախորդ բնակարանն ու եւս մեկ սեփականություն ու վճարել տան գումարի մի մասը, մյուս մասը` ըստ Վիտալինայի ներկայացուցիչ Էլինա Մազուրի` 10 միլոն ռուբլին, դեռ մնում է չմարված, տունն էլ գրանցված է Վիտալինայի անունով:
Ջիգարխանյանը, հիվանդանոցից դուրս գրվելուց հետո, ապրում էր իր հիմնած թատրոնի սենյակներից մեկում, իսկ օրերս նրա ընկերները բնակարան են վարձել, սակայն անձնական իրերը դեռ իրենց համատեղ բնակարանում են:
Հիշեցնենք, որ ընդամենը 1 օր առաջ, Վիտալինայի ու նրա ծնողների` երկիրն անսպասելի լքելու լուրի տարածվելուց հետո, Մազուրն ուղիղ եթերի ժամանակ հայտարարել էր, որ երիտասարդ կինը թողել է տան բանալիներն ու եթե Արմեն Բորիսովիչը ցանկանում է մտնել այդ տուն, կարող է անձամբ վերցնել բանալիները, իհարկե բանկային պարտքը մարելուց հետո:
