Փաշինյանի հարցազրույցը Deutsche Welle-ին.սա զուտ հայկական քաղաքական գործընթաց է եղել՝ առանց որևէ արտաքին գործոն
Հայաստանում տեղի ունեցած քաղաքական գործընթացները չեն պարունակել որևէ արտաքին տարր: Գերմանական Deutsche Welle-ի ռուսական ծառայությանը տված հարցազրույցում այս մասին նշել է ՀՀ վարչապետ Նիկոլ Փաշինյանը:«Հայաստանում տեղի ունեցավ իշխանափոխություն ժողովրդի որոշմամբ, դա թավշյա հեղափոխություն էր, որը տեղի ունեցավ առանց որևէ բռնության: Ես ՀՀ սահմանադրության շրջանակում ընտրվեցի վարչապետ: Մեր շարժման մեջ չկար որևէ աշխարհաքաղաքական կոնտեքստ, չեն եղել արտաքին քաղաքական հարցեր: Հայաստանում եղել է զուտ ներքին քաղաքական գործընթաց՝ ժողովրդի որոշմամբ»,- « ասել է Նիկոլ Փաշինյանը:
ՀՀ վարչապետը նկատել է, որ այդ օրերին միջազգային մամուլում տարբեր շեշտադրումներով հրապարակումներ էին լինում: Մասնավորապես, որոշ հրապարակումներով փորձ էր արվում Հայաստանում տեղ ունեցած շարժումը ներկայացնել այնպես, թե իբր այն կապ է ունեցել այս կամ այն արտաքին քաղաքական ուժերի հետ:
«Նորից եմ կրկնում, սա զուտ հայկական քաղաքական գործընթաց է եղել՝ առանց որևէ արտաքին գործոնի: Մեր արտաքին քաղաքական գործընթացում որևէ փոփոխություն չեղավ, մենք շարունակելու ենք աշխատանքը՝ զարգացնելով հարաբերություններ տարբեր ուղղություններով: Դա վերաբերում է Ռուսաստանի, ԱՄՆ-ի, Վրաստանի, Իրանի հետ մեր հարաբերություններին: Արտաքին քաղաքականության վեկտորը մնում է նույնը, ինչն առկա էր մինչ հեղափոխությունը»,-ասել է ՀՀ վարչապետը:
Լրագրողի հարցադրմանը, թե ինչու ՌԴ նախագահ Վլադիմիր Պուտինը չմիջամտեց գործընթացին և չաջակցեց Սերժ Սարգսյանին՝ Փաշինյանը նշեց, որ պատճառը շատ պարզ է. Հայաստանն անկախ և սուվերեն երկիր է: Լրագրողի դիտարկմանը, որ Ռուսաստանը, միշտ այլ կերպ է արձագանքել հետխորհրդային երկրների գործընթացներին՝ՀՀ վարչապետն ասաց. «Հայաստանը Հայաստանն է, ես կարծում եմ, որ յուրաքանչյուր երկիր ունի իր յուրահատկությունները: Մեր երկրի գլխավոր առանձնահատկությունն այն է, որ մենք մեծ ակնածանքով ենք վերաբերում մեր սուվերենությանն ու անկախությանը»:
