«Ժողովուրդ». Սպասենք՝ ինչ զարգացումներ կլինեն մեկ ամիս անց՝ հորդորել է Տարոն Մարգարյանը հրաժարականի դիմում ներկայացնողներին
«Ժողովուրդ» օրաթերթը գրում է․ «Արդեն չորս օր է՝ Երեւանը քաղաքապետ չունի: Ինչպես հայտնի է, հուլիսի 9-ին այդ պաշտոնից հրաժարական տվեց Տարոն Մարգարյանը: Եվ այսօր, «Երեւան քաղաքի ինքնակառավարման մասին» ՀՀ օրենքի համաձայն, Երեւանի ավագանին արտահերթ նիստ կգումարի, որպեսզի ընդունի քաղաքապետի հրաժարականն ու որոշի նոր քաղաքապետի արտահերթ ընտրության օրը: Ըստ օրենքի` դա կարող է լինել մեկ ամսվա ընթացքում, իսկ մինչ այդ պետք է խմբակցությունները թեկնածուներ առաջադրեն:
Սակայն դեռ ո՛չ ՀՀԿ-ն, ո՛չ «Ելք»-ը չեն շտապում հայտնել իրենց որոշումների մասին: Իսկ այսօրվանից սկսած մինչեւ ընտրության օրը քաղաքապետի պարտականությունները կդրվեն Կամո Արեյանի վրա: «Ժողովուրդ» օրաթերթին հայտնի դարձավ, որ Տարոն Մարգարյանի հրաժարականից հետո վարչական շրջանների ղեկավարները եւս ցանկացել են դիմում գրել եւ դուրս գալ, սակայն մեր տեղեկություններով` ՀՀԿ-ից, ինչպես նաեւ անձամբ Մարգարյանը նրանց հորդորել են դեռ այդպիսի բան չանել եւ սպասել, մինչեւ հասկանան, թե ով կարող է փոխարինել Մարգարյանին, կամ ինչ զարգացումներ կլինեն մեկ ամիս անց: Մեր տեղեկություններով` ՀՀԿ-ն հակված է պահել, իրենց թեկնածուն առաջադրել, իսկ ահա «Ելք»-ում ավելի շատ հակված են գնալ ավագանու արտահերթ ընտրությունների անցկացման ճանապարհով: Եթե այդպես լինի, ապա ընտրությունները տեղի կունենան սեպտեմբերին»:
Ավելի մանրամասն՝ «Ժողովուրդ» օրաթերթի այսօրվա համարում:
