Մարսի վրա անհայտ փայլուն օբյեկտ է հայտնաբերվել
Curiosity մարսագնացը «կարմիր մոլորակի» մակերևույթին անսովոր օբյեկտ է հայտնաբերել, որը նման է բնակտորի, ասվում է ԱՄՆ Օդագնացության և տիեզերական տարածության հետազոտությունների ազգային գործակալության (ՆԱՍԱ) պաշտոնական կայքում:Little Colonsay անվանումը ստացած անհայտ օբյեկտն ավելի վաղ նկատվել էր մարսագնացի տեսախցիկներից արված նկարներից մեկում:
«Խումբը ենթադրում է, որ դա կարող է երկնաքար լինել, քանի որ փայլում է», - ասել է դոկտոր Սյուզան Շվենցերը՝ հավելելով, որ օբյեկտի արտաքինը, այնուամենայնիվ, կարող է խաբուսիկ լինել, և դրա ծագումը պարզելու համար այն պետք է քիմիական անալիզի ենթարկել:
Curiosity մարսագնացը «կարմիր մոլորակի» վրա առաջին անգամ վայրէջք է կատարել 2012թ.-ի օգոստոսին: Անցած տարիներին մարսագնացը հաջողությամբ կատարել է առաքելության շրջանակում իր վրա դրված հիմնական առաջադրանքները՝ Մարսի վրա տաք քաղցրահամ լճերի ու գետերի գոյության հետքեր հայտնաբերելով և մի շարք այլ բացահայտումներ իրականացնելով:
