Գուրուրյանի կալանավորման ժամկետը ցանկացել են երկարաձգել 10 օրով, սակայն փաստաբանը բողոքարկել է
Ղազախստանի Կարագանդա քաղաքում տեղի ունեցած ծեծկռտուքի գործով կասկածյալ, անազատության մեջ պահվող Նարեկ Գուրուրյանի արտաքսման հարցի լուծման համար Ղազախստանը պետք է փաստաթղթեր ներկայացնի, որոնք ապացուցում են նրա մեղավորությունը: Shantnews.am-ի աղբյուրը հայտնեց, որ երեկ կայացել է Գուրուրյանին արտաքսելու հարցով դատական նիստը:«Դատախազը ցանկանում էր ևս 10 օր ավելացնել, որ նա 40 օր մնար մեկուսարանում, սակայն մեր փաստաբանը հետաձգեց: Մենք բողոքարկել ենք, Նարեկի փաստաբանն է դիմել: Նախապես 30 օրով էին ուզում կալանավորել նրան, այժմ ցանկանում էին ևս 10 օր ավելացնել, որ նա 40 օր անազատության մեջ պահվի»,- ասաց նա:
Վերջինս տեղեկացրեց, որ Նարեկին տեսակցելն արգելված է, միայն փաստաբանն է նրան այցելում: Նարեկի վիճակը նորմալ է, նա մեկուսարանում է, սպասում է արտաքսման որոշմանը, մինչև Ղազախստանն ապացույցներ ուղարկի:
«Ճիշտն ասած, նա մեղավոր չէ, նա ոչ մեկին չի սպանել, իր պատմելով՝ թուրք է եղել խփողը, ինքն էլ տեսել է, նույնիսկ վախենում է, ասում` եթե ինձ տանեն, ո՞նց եմ ասելու, որ ինքն է խփել»,- ասաց նա:
