Խայտառակ իրավիճակ ունենք աղբահանության հետ եւ չի բացառվում՝ Երեւանում կա լեշմանիոզ հիվանդության բարձր ռիսկ. այն փոխանցվում է մոծակներով
2018 թվականին արձանագրվել է 7224 աղիքային ինֆեկցիա, այս տարվա տվյալները չեն հրապարակվել: Այս մասին այսօր՝ հուլիսի 30-ին, լրագրողների հետ հանդիպման ժամանակ նշեց Սննդի անվտանգության պետական ծառայության նախկին պետ Գրիգոր Գրիգորյանը:Նրա խոսքով, վերջերս Շիրակի մարզում կենդանիների անկում է գրանցվել, որովհետեւ չեն պատվաստվել, բայց դրա մասին ոչինչ չի ասվել:
«Մեկ տարում Հայաստան է մտել կես տոննայից ավելի միս, մսամթերք, մեկ տաննայից ավելի թռչնամթերք: Նշվում է, որ կատարվել է 5 հազարից ավելի փորձաքննություն: Իսկ ի՞նչ են հայտնաբերել, տվյալներ չկան; Թե կոնկրետ որ մարզում ինչ հիվանդություն կա, դրա մասին ոչ մի հայտարարություն չի արվում»,-հայտարարեց Գրիգորյանը՝ հավելելով, որ այսօր առկա է սանիտարահամաճարակային պայթյունավտանգ իրավիճակ, թռչունների անկում:
«Կենդանիների հիվանդությունների վերահսկողության ազգային կենտրոնը լեշմանիոզ հիվանդության քարտեզագրում է կատարել: Այս հիվանդությունը հատուկ վտանգավոր հիվանդությունների շարքին է պատկանում, որը փոխանցվում է մոծակներով թափառական շներից: Մենք հիմա խայտառակ իրավիճակ ունենք աղբահանության հետ եւ չի բացառվում, որ Երեւանում գոյություն ունի լեշմանիոզի բարձր ռիսկ: Ոչ ոք չի գնահատել այդ ռիսկը»,-ընդգծեց նա:
