ՀՀ-ում քրգործ է հարուցվել ռուսական ընկերության կողմից զենքի մատակարարման մրցույթի խափանման համար

Ռուսական լրատվամիջոցները հաղորդում են, որ Հայաստանում քրեական գործ է հարուցվել «ծառայության նկատմամբ անփույթ վերաբերմունքի համար». պատճառը զենքի մատակարարման մրցույթի խափանումն է: Նշված մրցույթին մասնակցել է ORSIS ռուսական ընկերությունը: Մայիսին ՀՀ պաշտպանության նախարարությունն իր պատմության մեջ առաջին անգամ մրցույթ հայտարարեց մի քանի միլիոն դոլար գումարի ռազմական տեխնիկայի մատակարարման համար: Միայն ռուսական ORSIS- ը կարողացավ բավարարել որակավորման պահանջները:

Ըստ ռուսական լրատվամիջոցների՝ շուտով հայտնի է դարձել, որ մրցույթը փակվել է՝ առանց որևէ պատճառ նշելու: ORSIS- ը դիմել է Վերաքննիչ հանձնաժողովին և Հայաստանում իր շահերը ներկայացնող փաստաբանին, որի արդյունքում դատական հայց է ներկայացվել: Դեպքի մասին տեղեկացվել է նաև Ռուսաստանում ՀՀ դեսպանության ռազմական կցորդը:

Սակայն ՀՀ քննչական կոմիտեից հայտնում են, որ զինվորական քննչական գլխավոր վարչության վարույթում ORSIS ընկերության կողմից զենքի մատակարարման վերաբերյալ պայմանագրի խզման դեպքի առթիվ քրեական գործ չի քննվում: