Ադրբեջանում հօգուտ Հայաստանի լրտեսության համար մեղադրվող և բանտերում տանջամահ արված անձանց հարազատները բողոքի ակցիա են անցկացրել
Ադրբեջանում «Տերտերի գործում» ներգրավված անձանց հարազատները սեպտեմբերի 23-ին բողոքի ակցիա են անցկացրել երկրի գլխավոր դատախազության առավելապես ծանր հանցագործությունների քննչական վարչության դիմաց, գրում է «Թուրան» գործակալությունը:Նրանք պարզել են իրենց զավակների լուսանկարները և պահանջել են գործի արդար քննություն, ինչպես նաև քննության ժամանակ մահացածների արդարացում։
«Իմ 15-ամյա որդուն սպանել են։ Հիմա ուզում են գործը փակել։ Ես բողոքի ակցիա եմ անցկացրել նախագահի աշխատակազմի դիմաց, բայց իմ առաջ դռները չբացվեցին։ Ես օգնություն եմ ակնկալում տիկին Մեհրիբանից և Իլհամ Ալիևից։ Եթե իմ բողոքն ուշադրության չարժանանա, ես քայլարշավ կսկսեմ դեպի Տերտեր։ Ես պահանջում եմ իմ իրավունքները»,- նշել է ակցիայի մասնակիցներից մեկը։
Այդ պահին ոստիկանները սկսել են ցրել ակցիայի մասնակիցներին և բիրտ ուժով ձերբակալել են «Ամերիկայի ձայն»-ի և «Թուրան» գործակալության թղթակից Թափդըգ Գուլիևին։
2017 թվականի մայիսի 7-ին Ադրբեջանի գլխավոր դատախազությունը, Ազգային անվտանգության ծառայությունը, պաշտպանության և ներքին գործերի նախարարությունները հանդես են եկել համատեղ հայտարարությամբ, որում մի շարք զինվորականներ և քաղաքացիական անձինք մեղադրվում էին լրտեսության համար՝ հօգուտ Հայաստանի Հանրապետության հատուկ ծառայությունների։
Մայիսի 3-ին Ադրբեջանի ռազմական դատախազությունը հարուցել էր քրեական գործ՝ Քրեական օրենսգրքի 274-րդ հոդվածով (պետական դավաճանություն)։ Ստեղծվել էր համատեղ քննչական խումբ, որի կազմում էին դատախազներ, քննիչներ Պաշտպանության և Ներքին գործերի նախարարություններից, Ազգային Անվտանգության աշխատակիցներ: Ձերբակալվածները դատապարտվել էին տարբեր ժամկետներով ազատազրկման:
Սակայն շուտով պարզ էր դարձել, որ հետաքննության ընթացքում առնվազն 8 կասկածյալ տանջամահ է արվել։ Ավելի ուշ հետաքննությունն արդարացրել է մահացած 8 անձանցից 4-ին, իսկ քննիչները, որոնք զբաղվել են նրանց գործով, դատապարտվել են մինչև 7 տարվա ազատազրկման։
.jpg)
