40 օր ժամկետով աննախադեպ վարժական հավաքներ տեղի կունենան. սկիզբը հոկտեմբերի 20-ից
Հայաստանի կառավարությունն իր այսօրվա՝ հոկտեմբերի 3-ի նիստում որոշում կայացրեց հայտարարել պահեստազորի առաջին խմբի առաջին կարգում հաշվառված շարքային, ենթասպայական եւ սպայական կազմերի պահեստազորայինների վարժական հավաքներ` 40 օր ժամկետով` 2019 թվականի հոկտեմբերի 20-ից մինչեւ նոյեմբերի 30-ը:Հարցը ներկայացրեց պաշտպանության նախարար Դավիթ Տոնոյանը: Նա նշեց, որ վարժական հավաքները հայտարարվում են պահեստազորում հաշվառված քաղաքացիների`
1) ռազմական ունակությունների կատարելագործման,
2) մասնագիտական վերապատրաստման,
3) մասնագիտական պատրաստման,
4) բարձրագույն կրթություն ունեցող ենթասպայական կազմից պահեստազորի սպաների պատրաստման նպատակով:
Վարժական հավաքներին կներգրավվի ընդհանուր թվով 316 քաղաքացի, որոնցից 220–ը` շարքային կազմի, 12-ը` ենթասպայական կազմի, 84-ը` սպայական կազմի պահեստազորայիններ:
Սահմանեց, որ վարժական հավաքներում ներգրավվում են`
1) հրթիռահրետանային մասնագիտություններով` 159 պահեստազորային,
2) հակաօդային պաշտպանության մասնագիտություններով` 6 պահեստազորային` 2019 թվականի նոյեմբերի 18-24-ը ներառյալ,
3) կապի մասնագիտություններով` 23 պահեստազորային` 2019 թվականի նոյեմբերի 6-12-ը ներառյալ,
4) հետախուզական մասնագիտություններով` 95 պահեստազորային, որոնցից`
5) տեխնիկական մասնագիտություններով` 33 պահեստազորային` 2019 թվականի նոյեմբերի 4-10-ը ներառյալ:
Որոշման նախագծի ընդունումը պայմանավորված է պահեստազորի առաջին խմբում հաշվառված շարքային, ենթասպայական եւ սպայական կազմերի պահեստազորայինների ռազմական հմտությունների կատարելագործման, վերապատրաստման եւ պատրաստման վարժական հավաքների անցկացման անհրաժեշտությամբ:
Վարչապետ Նիկոլ Փաշինյանը հայտարարեց, որ սրանք պլանային իրադարձություններ են. «Այո, ասել ենք, որ այն զորավարժությունները, որ իրականացվում են աննախադեպ ծավալի են, բայց դա կապված չէ արտաքին կոնյուկտուրայի փոփոխության հետ, դա կապված է որոշակի գործելաոճի փոփոխության հետ: Այն վիճակում, որը գիտենք բոլորս, որեւէ բան չի փոխվել: Այս ծավալի զորահավաք մենք չենք ունեցել»:
Նշենք, որ որոշման հիմնավորման մեջ նշվում է. «Հաշվի առնելով այն հանգամանքը, որ վերջին տարիներին ՀՀ զինված ուժերը համալրվել են նոր սպառազինությամբ ու ռազմական տեխնիկայով, անհրաժեշտություն է պահեստազորայինների մասնագիտական պատրաստվածության որակի բարձրացումը` պահեստազորում կուտակելով համապատասխան զինվորական հաշվառման մասնագիտություն ունեցող պահեստազորայիններ: Բացի այդ, անհրաժեշտ է, որպեսզի զինված ուժերում ունենանք մարտունակ ստորաբաժանումներ` համալրված բարձր մասնագիտական պատրաստվածությամբ եւ ռազմաուսուցված պահեստազորայիններով: Այս նպատակով ՀՀ զինված ուժերի զորամասերում իրականացվում են պահեստազորայինների ռազմական հմտությունների կատարելագործման, վերապատրաստման եւ պատրաստման վարժական հավաքներ ու զորքերն աստիճանաբար համալրվում են ավելի պատրաստված եւ անհրաժեշտ զինվորական հաշվառման մասնագիտություն ունեցող պահեստազորայիններով: Այս գործընթացը կրում է շարունակական բնույթ եւ հետագա տարիներին կընդգրկվեն նոր ստորաբաժանումներ եւ նոր պահեստազորայիններ:
