Տեսանյութ. Ալեն Սիմոնյանը՝ պետական հեղաշրջման լուրերի, Վանեցյանի հակաքարզչության մասին
Ես այդ խոսակցություններին որեւիցե կերպ չեմ վերաբերվում, իմ օրակարգում նման հարց չկա, դա ինձ չի հետաքրքրում: Այս մասին այսօր՝ հունվարի 17-ին, ՔՊ գրասենյակում կայացած «Իմ քայլը» խմբակցության եւ վարչապետն Նիկոլ Փաշինյանի հետ հանդիպումից հետո լրագրողների հետ զրույցում նշեց ԱԺ փոխնախագահ Ալեն Սիմոնյանը՝ անդրադառնալով Հարցին, թե ինչպե՞ս է վերաբերվում տեղեկություններին, որ ԱԱԾ նախկին տնօրեն Արթուր Վանեցյանը հակաքարզչություն է իրականացրել Նիկոլ Փաշինյանի կնոջ եւ դստեր նկատմամբ:«Ես կարծում եմ, որ նման հարցեր օրակարգ բերելը այն պարզ պատճառով է, որ այսօր ուրիշ թեմա չկա խոսելու, դրանից են խոսում»,-ասաց նա:
Ալեն Սիմոնյանը չի կարծում, որ այդ հակաքարոզչության հետ կապված իրավապահներն անելիք ունեն. «Զրպարտության ժամանակ անձը դիմում է դատարան եւ հայց է ներկայացնում»:
Իսկ ահա պետական հեղաշրջման մասին լուրերի դեպքում, ըստ ԱԺ փոխնախագահի, քրգործ հարուցելու առիթ է. «Ծանոթ չեմ հրապարակմանը, բայց յուրաքանչյուր նմանատիպ հայտարարություն, բնական է, առիթ է հանդիսանում եւ հետազոտման, եւ քրեական գործ հարուցելու»:
Հարցին, թե հավատալո՞ւ է, որ Արթուր Վանեցյանը Միքայել Մինասյանի հետ կարող էր համագործակցել, որպեսզի պետական հեղաշրջում իրականացնի, նա ասաց, որ չի ցանկանում այդ հարցին պատասխանել: Դիտարկմանը, որ մի կողմում իր թիմն է, մյուս կողմում իր ընկեր Վանեցյանը, Ալեն Սիմոնյանն ասաց. «Իմ թիմը Հայաստանի Հանրապետությունն է, իմ թիմը «Քաղաքացիական պայմանագիրն» է»
