Տեսանյութ. Հրեա ուղղափառ ընտանիքին դուրս են հանել ինքնաթիռից` նրանց վրայից եկող վատ հոտի պատճառով
Ամերիկյան American Airlines ավիաընկերության օդաչուն խնդրել է ինքնաթիռից դուրս հանել հրեա ուղղափառ ընտանիքին` նրանց վրայից եկող վատ հոտի պատճառով, հայտնում է The Times of Israel հրատարակությունը:Հրատարակության տվյալներով` օդանավ նստելուց անմիջապես հետո բորտուղեկցորդուհիները Յեհուդա և Ջեննի Ադլեր ամուսիններին իրենց մեկուկես տարեկան դստեր հետ խնդրել են լքել օդանավը: Այս հարցում պնդել է օդաչուն, որը դժգոհել է նրանց վրայից եկող հոտից:
Զույգն իր հերթին նշել է, որ թռիչքից առաջ լոգանք է ընդունել և մոտենալով այլ ուղևորներին` հարցրել է հոտի մասին: Վերջիններս խոստովանել են, որ հոտ չեն առնում ամուսինների վրայից:
«Դրանից հետո բորտուղեկցորդն արհամարհական և ստորացուցիչ հայտարարություն է արել, որում մասնավորապես խոսվել է այն մասին, որ ուղղափառ հրեաները շաբաթը մեկ անգամ են լվացվում»,- ասվում է նյութում:
Արդյունքում ընտանիքին հեռացրել են օդանավից: Զույգը կարողացել է վերջնակետ հասնել միայն հաջորդ օդանավով:
Ամուսինները դատական հայց են ներկայացրել ավիաընկերության դեմ` նշելով, որ խտրական վերաբերմունքի են արժանացել: Ավիաընկերությունն իր հերթին նշել է, որ, այդպես վարվելով, մտածել են այլ ուղևորների հանգստի և հարմարավետության մասին:
