Հնդկաստանը Հայաստանի հետ 40 մլն դոլարի ռազմական համաձայնագիր է կնքել
Ըստ հնդկական լրատվամիջոցների հաղորդած տեղեկությունների` Հնդկաստանը Հայաստան ռադիոտեղորոշիչներ մատակարարելու համար 40 մլն դոլար արժողությամբ համաձայնագիր է կնքել:Ռադարների համակարգը մշակվել է Պաշտպանության հետազոտությունների և զարգացման պետական էլեկտրոնիկայի և ռադիոլոկացիոն զարգացման հիմնարկում:
Պայմանագիրը նախատեսում է 4 Swathi ռադարների մատակարարում, որոնք ապահովում են թշնամու զենքի արագ, ավտոմատ և ճշգրիտ հայտնաբերում 50 կմ հեռավորությամբ: Ռադարները հայտնաբերել կարող են թե´ ականանետները, թե´ արկերը, թե´ հրթիռները:
Հնդկաստանը արդեն սկսել է ռադիոտեղորոշիչ համակարգը Հայաստանին մատակարարելու գործընթացը: Նշվում է, որ հնդկական բանակն այս համակարգերը կիրառում է Քաշմիրի շփման գծում:
Հնդկական կայքերն ընդգծում են, որ Հայաստանը նաև իրականացրել է ռուսական և լեհական համակարգերի փորձարկումներ, բայց արդյունքում ընտրել է հնդկական համակարգը: Որպես գործարքի մաս` Նյու Դելին 4 նման համակարգ կմատակարարի Հայաստանին:
