Վիրուսը սրընթաց կերպով տարածվում է.Աշխարհը գտնվում է նոր և շատ վտանգավոր փուլում.
Աշխարհում հունիսի 18-ին կորոնավիրուսով վարակվածների թվով ռեկորդը վկայում է համավարակի լայն տարածման մասին, ճեպազրույցի ժամանակ հայտարարել է Առողջապահության համաշխարհային կազմակերպության ղեկավար Թեդրոս Ադհանոմ Հեբրեյեսուսը, հաղորդում է ՌԻԱ Նովոստի-ն։«Երեկ ԱՀԿ-ում նոր տեղեկություններ են ստացվել COVID-19-ով վարակված ավելի քան 150 հազար նոր դեպքերի մասին։ Ներկայում դա մեկ օրվա ընթացքում գրանցված ամենաբարձր ցուցանիշն է»,-նշել է պաշտոնյան։
Նա հավելել է, որ հիվանդության նոր դեպքերի կեսը գրանցվել է Հյուսիսային և Հարավային Ամերիկայում, որը մայիսին համարվել էր համանավակի կենտրոն։ Վարակվածների մեծ թիվ է գրանցվել նաև Հարավային Ասիայում և Մերձավոր Արևելքում։
«Աշխարհը գտնվում է նոր և շատ վտանգավոր փուլում»,-ընդգծել է Հեբրեյեսուսը։
Նա հավելել է, որ մարդիկ հոգնել են տանը մնալուց, իսկ կառավարությունները ձգտում են վերականգնել տնտեսական գործունեությունը։
«Սակայն վիրուսը սրընթաց կերպով տարածվում է, այն դեռևս մահացու վտանգ է ներկայացնում, և մարդկանց մեծամասնությունը դեռևս խոցելի է»,-նախազգուշացրել է ԱՀԿ-ի ղեկավարը։
Կորոնավիրուսի համավարակը տարածվել է գրեթե ամբողջ աշխարհում։ Ընդհանուր առմամբ, ԱԿՀ-ի տեղեկություններով, վարակը հայտնաբերվել է ավելի քան 8,35 միլիոն մարդու մոտ, որոնցից 450 հազարը մահացել է։
